futsal GM
Nunanut allanut unammisartunut sungiusaasoq: Piginnaanilippassuaateqarpugut
Kalaallit nunanut allanut unammisartut ima pikkoritsigilersimapput allaat FIFA-mut ilaasortanngoriaannanngorsimallutik, angutit inersimasut isikkammik arsaannermik nunanut allanut sungiusaasuat, Tekle Ghebrelul oqarpoq.
- Nunarput futsalimik siunissarissaapoq.
Sapaatip akunnerata siulianiani Maniitsumi futsalimk pissartanngorniutivittoqarnerani malinnaareerluni, isikkammik arsaannermi nunanut allanut sungiusaasoq Tehkle Ghebrehul saniatigullu B-67-imi sungisaasoq taama oqarpoq.
Taassuma kalaallit unammisartuisa pitsangoriartuinnarnerat nuannaarutigaa.
- Isumaqarpunga unammisartut taama pikkoritsigisut FIFA-mut ilaasortanngoriaannaasugut. Ukiut tamaasa arsariaaseq sukkatsikkiartorlunilu pitsanngoriartortarpoq.
Atuaruk: Pissartanngorniutivinnermi Nágdlúnguup B-67 ajorsartippaa
Inuusuttut pikkorissorpassuit
- Inuusuttorpassuaqarpoq arsarllaqqissunnik, tamannalu nunanut allanut unammisartunut pitsaasuuvoq. Unammeqataasut piareersarluarsimapput, amerlasuulli pitsaalluinnartumik takutitsisimallutik, Tekle Ghebrelul oqarpoq.
Unammersuarnermilu pissartanngortut Nagdlunguak Ilulissaneersut taassuma nersualaarpai.
- Akersuulluarlutik pissartanngorput. Pissartanngorniutivinnermi taakku 0-2-mik kinguarsimangaluarput, unamminerullu ingerlanerani mumisitsinermikkut pissartanngorlutik. Marlulissat, Nick Reimer Lars-Erik Reimerimilu nunanut allanut unammisartuunerminni ilikkarsimasatik holdeqartiminnut kivitsinerat takullugu assut nuannerpoq, Tekle Ghebrelul oqarpoq.
Sungiusaasut peqataatinneqassapput
Nunatsinni arsaanneq ineriartortinneqaannassapat peqatigiiffiit sungiusaasunut aamma ineriartortitsinermut malinnaatitsisariaqartut, Tekle Ghebrelul isumaqarpoq.
- Neriuutigaraa sungiusaasut pisariaqartitaminnik pikkorissartinneqartassasut. Uagulli nunanut allanut sungiusaasut aamma illoqarfinnut tikeraartarnitsigut unammisartunik holdinillu kivitseqataalluarsinnaavugut, taanna oqarpoq.
Atuaruk: Futsalimi GM-ertoqarnerani isertitsisoqarluartoq
Tupaallatitsinerit marluk
Unammersuartoqarnerani nunanut allanut sungiusaasup holdit marluk tupaallaatigai.
- T-41 Aasianneersut Kugsallu Qasigiannguaneersut unammilluaqaat. Inuusuttuupput periarfissamillu atorluaallutik, isumaqarpungali angusarissaarnerusinnaangaluartut.
- Ukioq kingulleq pissartaasimasut IT-79 pakatsiffigilaarpakka. Angusarissaarnerunissaat naatsorsuutigisimangaluarpara. Pissartanngorniutivinnermummi anngunnissaat naatsorsuutigisimangaluarpara, Tekle Ghebrelul tikkuaavoq.
Arsaaffik isornartorsioraa
Taassumali arsaaffik isornartorsiorpaa.
- Maniitsumi arsaaffik naammaginngilluinnarpara. Neriuutigaara tulliani unammersuartitsisoqarlerpat arsaaffigineqartussaq minnerpaamik 20x40 meterimik angissuseqassasoq, unammersuartoqarneranimi taama angitiginngilaq. Dommeriusut tamanna aamma iluarinngilaat.
- Nunani allani unammisaqattaarnerni angissusiliunneqarsimasut atorneqartuaannarput, Maniitsumilu arsaaffik amippallaarlunilu naappallaarpoq. Neriuutigaara aaqqissuisut tulliani unammersuartitsilerunik tamanna eqqarsaatigilluarumaaraat, unammersuarnernimi nunanut allani unammersuarnerni piumasaqaatit atorneqartariaqarluarput, Tekle Ghebrelul oqarpoq.