VM-imut anngunniunneq
Nunanut allanut unammisartunut sungiusaasoq makitsisoqareersoq: VM-eqataarusuppugut
Arnat assammik arsartartut nunanut allanut unammisartuinut sungiusaasup Cuba-mi VM-imut anngunniutilerunik unammisassatik ilisimasaqarfigivallaanngilai. Kisianni VM-imut anngunnissaq anguniarneqarpoq
Panamerikami pissartanngorniunnissamut makitsisoqaqqammernera Sermitsiaq.AG-mit marlunngormat allaaserineqareerpoq. Unammersuaarneq Cubami ingerlanneqassaaq maajip 21-anit aallartittumik.
Kalaallit assammik arsartartuisa Brasilia, Paraguay, Venezuela, USA aamma Puerto Rico gruppikkaarnermi unammissavaat.
Nunanut allanut unammisartut sungiusaasuata Jakob Andreasenip Brasilia aamma USA minillugit sinneri unammisassatik ilisimasaqarfigivallaanngilai.
- Brasiliamut ajugaanissarput naatsorsuutiginngilarput, kisianni unamminerit amerlanerpaartaat ajugaaffiginiarsarissavagut. Nunarsuarmi pissartanngorniunnissamut anngunnissarput anguniagaraarput, Jakob Andreasen Sermitsiaq.AG-mut oqarpoq.
Nunanut allanut unammisartuini malunnaatillit unammersuaarnermi ajoqqusinnginnissaat neriuutigaa. Unammisartoq Mia Rasmussen aamma målmandiusartoq Rina Lorentzen nunanut allanut unammisartuni pingaarutilittut isigai.
Piareersarluarneq
Nunanut allanut unammisartut Kalaallit Nunaat sinnerlugit unammeqqissinnaalernerat sungiusaasumit nuannaarutigineqarpoq.
- Ukiuni arlalinni arnani nunanut allanut unammisartoqanngilaq. Taamaammat assammik arsartartut kattuffiata suliniuteqarluarnera nuannaarutigaara. Uungami killinnissarput ukiuni kingullerni pingasuni sulissutigaarput, sungiusaasoq oqarpoq.
- Unammiartortussat sungiusarluartorujussuupput. Kisianni suli pikkorissiartortoqartariaqarpoq. Pitsaasumik sungiusartoqartoqartariaqarpoq, nerisaqarneq mianersuuttariaqarpoq aamma suli sukataartoqartariaqarpoq. Nunanut allanut unammisartut piumassuseqarluartorujussuupput, tamanna takullugu nuanneqaaq, Jakob Andreasen oqarpoq.
Panamerikami pissartanngorniunneq maajip 21-anit 28-at ilanngullugu ingerlanneqassaaq.
Nunarsuarmi pissartanngorniunneq Danmarkimi decembarimi ingerlanneqassaaq.