Island Games
Nunanut allanut unammisartoq: Peqataalluni misigisassarpassuaqarpoq
Kalaaleq arsaattartoq Apollonie Kreutzmann sisamassaa Island Gamesimi peqataavoq
Kalaallit arnat arsaalluni nunanut allanut unammisartuini midtbane-mi unammisartoq, 27-nik ukiulik Apollonie Kreutzmann arsaattartutut aappassaa peqataavoq.
Taanna oqarpoq Island Gamesimi peqataalluni tamatigut misigisassarpassuaqarnartartoq.
– Unamminerit pitsaanersaapput. Unammisartut nunanit allaneersut assigiinngitsut, sungiusaqatigiittartorujussuit unammisarpavut. Nunanut allanut unammisartuvut nunat allanisut akulikitsigisumik sungiusarneq ajorput, ulluinnarnilu arsaattarfinni ujaraaqqanik qallersimasuni arsartarpugut. Taamaattumik unamminerit tamatigut uannut annertuumik misigisaqarfiusarput, Apollonie Kreutzmann Sermitsiaq.AG-mut oqaluttuarpoq.
Taanna siusinnerusukkut aamma volleyball-ertartutut marloriarluni Island Gamesimi peqataasarsimavoq, 2007-imi 2009-milu.
Sungiusarneq
Apollonie Kreutzmann ulluinnarni Nuummi B-67-imi unammisartuuvoq. Taanna oqaluttuarpoq Island Games sioqqullugu silami sungiusarpallaarsimanani.
– Nunatsinni sila pissutigalugu silami sungiusarnissaq ajornakusoorsimavoq. Taamaattumik timigissartarfimmi sungiusarnerusarsimavunga. Aatsaat aalangajalerluta silami sungiusartalerpugut. Illup iluani sungiusartaraluarpugut, takkuttulli amerlavallaraneq ajorput, Apollonie Kreutzmann oqarpoq, taannalu Nuummi meeqqat atuarfiisa ilaanni ilinniartitsisuuvoq.
Peqatigiilluarput
Taanna oqarpoq nunanut allanut unammisartuni ataqatigiilluartorujussuullutik.
– Aallaqqaataaniilli holdimi ataqatigiilluartoqarsimavoq. Immitsinnut ilisarisimalluarpugut avataaniittoqanngiarlu. Danmarkimi sungiusaqatigiinnitsinni sorpassuarnik sammisaqarsimavugut, tamannalu pissutigalugu holdimi peqatigiilluaqaagut. Assersuutigalugu qajartorsimavugut, isumaqarpungalu holdlederit sulilluarsimaqisut, Apollonie Kreutzmann oqarpoq.
Arsaqatigiinneralllu siuariareersimavoq, taanna oqarpoq.
– Suleqatigiilluaqaagut, tunioraattarnerput ingerlalluartorujussuuvoq. Unammisartunik peqatigiissitsiniarneq kingullermik 2011-mi peqataanittut ippoq, isumaqarpungali maanna pitsaanerusumik ingerlasoq, Apollonie Kreutzmann oqarpoq.