Island Games
Nunanut allanut sungiusaasoq: Unammineq ilungersunaqaaq
Kalaallit Nunanut isikkamik arsaattartut allanut unammisartui semifinalernermini sukataagaatsiarput. Angutit isikkamik arsaattartut pissanganartorsiungaatsiareerlutik pissartanngorniutivinnissamut anngupput.
Unammineq pissanganaatsiartumik straffeqattaarnertalillu kalaallit angutit isikkamik arsaattartui Island Games-ertoqarnerani, Gotlandimi ulluni makkunani ingerlanneqartumi, pissartanngorniutivinnissamut piareerput.
- Pissartanngorniutivileratta assut nuanneqaaq. Unammineq ajugaagatsigut eqqissiallannaqaaq, nunanut allanut sungiusaasoq, Tekle Ghebrelul, Sermitsiaq.AG-mut oqarpoq.
Unammineq ilungersunartoq
Unammineq assut ilungersunarsimasoq, taassuma oqaatigaa.
- Sakkortuumik anoraasuarpoq, taamaammallu arsaq aqukkuminaassimalluni. Unammineq aalajangersimasinnaangaluarparput, unamminerlu naammassinera assut nuanneqaaq. Kisianni unammisartut qasoqqasorujussuupput, pissartanngorniutivinnissamulli piareersarneqarnissaat timikkut sungiusaasut massakkut isumagissavaat, nunanut allanut sungiusaasoq erseqqissaavoq.
Anførillu Nukannguaq Zeebip Niels Svanillu arsaqqusaaqqasimanngereerluni peqataaqqissinnaalernerat, Tekle Ghebrelulip nuannaarutigaa.
Unammisartut imminut tatigisorujussuit
- Taakku unamminissamut piareersimalluinnassapput, tamannalu unammisartoqatigiinnut iluaqutaassaaq. Unammineq ajugaaffiginissaa qularutiginnginngilarput, pissartanngorniutivinnissamulli ernumassuteqanngilluinnarluta, Tekle Ghebrelul oqarpoq.
Pissartanngorniutivinnermi Kalaallit Nunaat aamma Isle of Man unammissapput, unammineq Nunatta nalunaaqutaa malillugu 09.00 aallartissaaq.