Island Games
Nunanut allanut sungiusaasoq: Island Gamesini naggataamik peqataagunarpugut
Kalaallit angutit nunanut unammisartui unammilligassanut nutaanut piareerpoq, unammersuarnernulli allani peqataasalernissamut piareerlutik
Isikkamik arsaannermik angutit nunanut allanut unammisartui ullumi sapaammi Island Gamesimi unammineq siulleq ingerlatissavaat.
Island Games Gotlandimi ingerlanneqarpoq, unammisartulli Western Isles unammissavaat.
- Unammersuarnernut piareersimavugut ajugaarusussuseqarlutali, nunanut allanut sungiusaasoq Tekle Ghebrelul Sermitsiaq.AG-mut oqarpoq.
Unammilligassat nutaat
Unammisartulli Island Gamesimi naggataamik peqataagunartut, taassuma paasissutissiaraa.
- Neriuppunga naggataamik peqataalluta. Island Gamesimi tulliani ingerlanneqalerpat isikkamik arsaattartut peqataassanngillat, taamaammat tamatuma uniffiginissaa pisariaqanngilaq. Ingerlaqqittariaqarpugut unammilligassanillu nutaanik ujartuilluta, taanna oqarpoq.
Tamatuminngalu unammisartut pitsaaneruliinnassasut, Tekle Ghebrelul oqarpoq.
- Island Gamesimi ukiut marlukkaarlugit ingerlanneqartarpoq. Uagut ukiut tamaasa unammisarusuppugut. Nunanut allanut unammiarluni unamminerpassuarnillu ingerlataqarluni aammalu misilittagaqarnerulerluni pitsaassaqaaq, nunanut allanut sungiusaasoq erseqqissaavoq.
Atuaruk: Angutit nunanut allanut unammisartui Island Gamesimut peqataatitassai
Ullumi unamminiartut
Island Gamesimi Kalaallit Nunaata, Western Isles, Frøya kiisalu hjemmebanertut Gotland gruppeqatigaat.
- Unammersuarnermi kikkut unammilligarinerpaavisigit?
- Qularutissaanngitsumik Gotland, Tekle Ghebrelul oqarpoq.
Kalaallit nunanut allanut unammisartui ullumi sapaammi Nunatta nalunaaqutaa malilugu 13.00 unammissapput. Taakku Western Isles naapissavaat.