Nunanut allanut ministerip iliuuseqarnissaa Dansk Industrimit piumasarineqarpoq

Pituffimmi kiffartuussinissamut isumaqatigiissutip suliarineqarnera suli naammassinngitsoq Dansk Industrimit isumaqarput.

Exelis Servicesip Pituffimmi kiffartuussinissamut isumaqatigiissutaa septembarip 30-anit aallartittussaq atuuttussanngortillugu Amerikarmiut suliarinnittussarsiussinermi naammagittaalliorfik Government Accountability Office naak aamma aalajangiussaqareeraluarsoq. Exelis Servicesip Pituffimmi kiffartuussinissamik isumaqatigiissutaa ukiuni arfineq marlunni atuutissaaq.

- Naammagittaalliut suliarineqartareerpoq. Politikkikkut maanna suliannanngorpoq. Nunanut allanut ministerip Martin Lidegaardip, Radikale Venstre, isumaqatigiissutip amerikarmiunit atuutsinneqarnissaa qulakkeertariaqaraa isumaqarpugut, Dansk Industrimit Frank Bill oqarpoq.

Ministeri: Naammaginanngilaq
Martin Lidegaard aalajangiisoqarnera oqaaseqarfigisareerpaa. Washingtonimi aalajangiisoqarnera TV2-kkut oqaaseqarfigaa:

- Aalajangiineq naammaginartinngilara. USA-lu politikkikkut isumaqatigiissuteqarnitta anersaava malinneqanngilaq, oqarpoq.

Suliffeqarfiit pingasut naammagittaallioraluarput isumaqatigiissut malillugu suliffeqarfik Danmarkimit Kalaallit Nunaanniilluunniit isumaqatigiissuteqarfigineqartussaammat, taamaattumik Exelis Service tassunga piumasaqaammut tulluartuunngitsoq isumaqarlutik.

Exelis Services Danmarkimi allattorsimaffimmiippoq kisianni amerikarmiut suliffeqarfiata Vectrusip suliffeqarfiutigaa.

Danmarki USA-lu isumaqatigiissuteqarnikuugaluarput Pituffimmi kiffartuussinissamut isumaqatigiissutit kalaallit imaluunniit danskit suliffeqarfii sullissisuusassasut.

- Isumaqatigiissutaasoq U.S Forcemit allanngortinniarneqarnera malunnarpoq. Kiffartuussinissamut isumaqatigiissummut qinnuteqarniaraanni allaqqasoqanngilaq USA-mi suliffeqarfiit Danmarkimi piginneqataallutik suliffeqarfiutaat qinnuteqarsinnaanerat, Frank Bill oqarpoq.

Martin Lidegaard Washingtonimiippoq, tassani amerikarmiut illersornissakkut ministeriaqarfiannik ataatsimeeqateqassaaq, tamarmillu isumaqatigiissutigisinnaasaanik isumaqatigiittoqarnissaa anguniassallugu.