Nunanut allanut ministeri Pituffik pillugu isumasioqatigineqassaaq

Danskit nunanut allanut ministeriat Martin Lidegaard, Radikale Venstre, Thulebasemi kiffartuussinissamut isumaqatigiissummut tunngatillugu nukingiussatut isumasioqatigiinnissamut ataasinngornermi qaaqquneqarpoq.

Qaaqqusisuuvoq Inuit Ataqatigiinneersoq Johan Lund Olsen, aappaagu suliffeqarfik amerikkarmiuusoq Greenland Contractorsip isumaqatigiissutigisimasaanik nangitsippat kingunerisinnaasaanik allatuulli ernummateqartoq.

- Nunanut allanut ministerilu nukingiussatut isumasioqatiginnitsigut isumaqatigiissummut tunngatillugu ingerlaaserineqarsimasumut kiisalu Kalaallit Nunaannut Danmarkimullu kingunerisinnaasaanut atatillugit paasisaqarnissarput neriuutigivara. Maannakkorpiaq qaqugu pisinnaaneranut ataqatigiissaarivugut, neriuutigaaralu isumasioqatigiissitsineq juullertinnagu pisinnaassasoq, tusagassiutinut nalunaarummi Johan Lund Olsen oqarpoq.

Isumasioqatigiissitsinermi apeqquteqarumaartut allat tassaapput Enhedslistenimeersoq Finn Sørensen aamma SF-meersoq Annette Vilhelmsen.

'USAF-ip amerikkarmiunut kiffartuussinissamut isumaqatigiissutaanut nutaamut kiisalu Kalaallit Nunaannut Danmarkimullu qanoq sunniuteqarnissaanut atatillugit ministeri qanittukkut nassuiaaqquneqarpoq. Taakkununnga atatillugu ministerimit makkua nassuiaqquneqarput;

- Thulebasemut atatillugu danskit-amerikkarmiullu illersornissamut isumaqatigiissutaannut isumaqatigiissut qanoq tulluartiginersoq.

- Isumaqatigiissutip suliarineqarnerata ingerlarnga nassuiaqquneqarpoq, pingaartumik danskit kalaallillu oqartussaatitaasa qanoq ataqatigiissaarisimanerannut isumaqatigiinniarnermilu tamarmik immikkut qanoq suliarinnissimanerannut tunngatillugit.

- Kiffartuussinissamik isumaqatigiissutip danskit kalaallillu ingerlatseqatigiiffianniikkunnaarnera suliffeqarnermut isumaqatigiissutaanullu qanoq kinguneqassanersoq nassuiaqquneqarpoq, Thulebasep praktikkerfittut ilinniagaqarfittullu atuuffia ilanngullugu eqqarsaatigalugu.

- Kiffartuussinissamik isumaqatigiissutip danskit kalaallillu ingerlatseqatigiiffianniikkunnaarnera kalaallit aningaasaqarnerannut qanoq sunniuteqassava, kiisalu

- Naalakkersuisut pisami qanoq iliuuseqarsimappat qanorlu iliuuseqarnialersaarpat?”

Isumasioqatigiisitsineq ammasuussaaq Kalaallillu Nunaat pillugu ataatsimiititaliamit aaqqissuunneqassalluni. Illersornissamut ataatsimiititaliaq qaaqquneqarpoq, partiiniillu borgerliusunit tapersersorteqarnissaq anguniagaavoq. Partiit arlallit Johan Lund Olsenituulli pisamut tunngatillugu Folketingimi apeqquteqarsimapput. '

Siumut tunuliaqutaralugu Inatsisartunut qinigassanngortittup Kenneth Rasmussenip sapaatiummat oqaatigaa, Inatsisartunut qinigaassagaluaruni Pituffimmi nutaamik sullissinissamik isumaqatigiissusiortoqarnissaa suliariniarlugu.