Ingerlatsineq
Nunanit tamalaanit kajumissaarut: Appanniarneq unitsinneqarli
Dansk Ornitologisk Forening aamma Islandimi, Norgemi USA-milu peqatigiiffeqataasa Naalakkersuisut appanniarneq tamaat unitsinneqarnissaanik kajumissaaripput, nunguinnginnissaat anguniarlugu
Kalaallit Nunaata Kitaani appat nungunnissaminnut ulorianartorsioraluartut, Nunatta appanniarneq suli ingerlammagu nunanit tamalaanit maluginiarneqalerpoq.
Dansk Ornitologisk Forening aamma Islandimi, Norgemi USA-milu peqatigiiffeqataasa, kiisalu tamatumani nunani tamalaanit kattuffik, BirdLife International, Naalakkersuisunut ataatsimut allagaqarnerminni Pinngortitaleriffiup ukiuni qulini appanniaqqusinngikkallarnermik innersuussutaanut tusarnaarnissaannik kajumissaaripput, maannalu iliuutsit piniarnerup sivikillisinneqarner taarserlugit.
Ernumasut
Timmisat pillugit suliniaqatigiiffiit allakkami Kujataata Kitaani appat annertuumik ernumassuteqarfigalugit oqaatigaat. Biologillu paasisimasaqarnerannut politikkikkut akisussaassuseqarnermik tusarnaarnermillu kajumissaaruteqarput.
Atuaruk: Peqatigiiffik appanik ernumassuteqartoq
Aarlerinartoq
- Kalaallit Nunaata Kujataani appat amerlassusaasa ikiliartornerujussuat unikaallatsinniarlugu, Kalaallit politikerii appaqatigiiaani arlalinni ajalusoortoqarnissaa mianersoqqussutigineqaraluartoq appanik illersuinissaq piumassuseqarfiginngikkaat aarlerinarpoq. Assortuunneq ukiorpassuarni pivoq, biologillu appat piaqqiortut Kalaallit Nunaanni Upernavimmiit kujammut, piniarneq, ajoqusersuineq aamma melersuinerit taamaatinngippata nunguinnissaat mianersoqqussutigisareerpaat. Taamaakkaluartoq piniarneq suli ingerlanneqarpoq, Knud Flensted, Dansk Ornitologisk Foreningimi biologiusoq taama oqarpoq.
Atuaruk: WWF: Kinguaariit tullii appatugassaqanngillat
Appaqatigiiaat arlaqartut ikileriarujussuarnikuupput. Timmiarsiuullu kattuffiisa tikkuarpaa, upernaakkut piaqqiorfiup nalaani amerlassusaat piniarnermut ulorianartorsiortartut, timmiaq aatsaat tallimanik ukioqaleraangami piaqqiulertarami, piaqqiorfiullu nalaani ataasiinnarmik manniliortarluni.
Nunanit tamalaanit tusaamaneqarneq
Dansk Ornitologisk Foreningip aamma BirdLife Internationalip, Kalaallit Nunaata nunanit tamalaanit tusaamaneqarnera polikerinut eqqaarsaatigeqqullugu, appat siunissaat pillugu oqallisiginnileraangata kajumissaarutigaat.
Kalaallit Nunaat nunatut akissussaassuseqartutut saqqummissaguni, nunap inuussutissaatai nungusaataanngitsumik ingerlallugit, amerlassusaat qajannarunnaarnissaata tungaanut qinikkat timmiaq eqqissisimativittariaqarpaat. Maanna taamaattoqartillugu Kalaallit Nunaata jujataata kitaani appat nunguissinnaapput, kattuffiit naqissusiipput.
Atuaruk: Appat eqqisisimatilluinnarnissaat pilersaarutaanngitsoq