Nunanit tamalaaneersut Sisimiunut qamusioriartussasut

'Arctic Nomads'. Aaqqissuussaq taama atserneqarsimasoq sisamanngorpat tallimanngorpallu Sisimiuni ingerlanneqalerpat inuppassuit peqataassapput.

Qamutinik sanasartut Ruslandimeersut, USA, Canadamit Nunatsinniillu avannaarmiortagut, Tunu, Qeqertarsuup Tunua Sisimiormiullu peqataassapput. Taakkulu saniatigut Naalakkersuisut, takornarialerisut, ilisimatuut filmiliortartullu peqataassallutik.

Atassuteqateqalerneq

Aaqqissuussisoq Pipaluk Løgstrup Sisimiuni peqataasussat naapinnissai qilanaaraa.

- Peqataasussat inuinnarni najugaqassapput nalunngisaqalernissaq siunertaralugu. Nunat akimorlugit ilisarisimasaqalernissaq, naak tamarmik immaqa oqaatsitik paasisinnaanngikkaluaraat. Russit nutserisumik namminneq nassassapput, taamaanngippat ussersornerit google translatelu atorlugit attaveqatigiittoqartassalluni, Pipaluk Løgstrup oqarpoq.

Sammisassarpassuit

KTI-p sannaviani innuttaasut piffissami aalajangersimasumi qamutit assigiinngitsut arfineq-marluk sananeqarneri alakkarneqarsinnaassapput.

Sisimiormiunullu aaqqissuussat assigiinngitsorpassuit alakkarneqarsinnaajumaarlutik: Saqqummiinerit, isiginnaagassianik takutitsinerit illuikkiamilu oqaluttuaqattaannerit ilaatigut alakkagassanut ilaassallutik.

Aaqqissuussap Arctic Nomads ingerlanneqarnerani filmiliortartut arlallit malinnaassapput soorlu USA-mit Weather Channel peqataassalluni.