takutitsineq
Nunanit avannarlerneersut kulturertik Londonimi nittarsaakkaat
Nunat avannarlermiut kulturi pillugu aaqqissuussaat annerpaat tuluit nunaanni ulluni makkunani ingerlanneqaleruttorpoq. Naalakkersuisoq Doris Jakobsen ammaanersiornermi peqataavoq
Nunat avannarlermiut Englandip illoqarfiisa pingaarnersaani Londonimi kultur pillugu aaqqissuussipput.
Southbank Centre nunat avannarlermiut eqqumiitsuliaat, nipilersortaasaat, kulturiallu pillugit ukioq tamaat saqqummersinneqartartussaq ammaanersiorpaat. Southbank Centre tuluit nunaanni kulturi pillugu saqqummersitsisarfinni anginerpaavoq, Londonip qeqqani inissisimasoq.
'Nordic Matters'-imi peqataasut kulturertik pillugu saqqummersitsisassapput. Taakkunani Danmark, Norge, Sverige, Kalaallit Nunaat, Savalimmiut, Ålandsøerne, Island Finlandilu tuluit nunaannit nunat avannarliit pillguit aaqqissuussami annerpaami peqataassallutik.
Aaqqissuussarlu tallimanngormat ammaanersiorneqarmat kultureqarnermut naalakkersuisoq Doris Jakobsen (S) peqataavoq.
Aaqqissuussat arlaqartut
- Kalaallit Nunaanni kultureqarneq pitsanngorsarsinnaajumallugu nunani allani inuussutissarsiornikkut ineriartortitsinissaq Kalaallit Nunaanni atorfissaqartipparput. Neriuppunga saqqummersitsineq taanna tamassumunnga tapersiissasoq, tusagassiuutinut nalunaarummi allappoq.
Isiginnaartitsinerit, tusarnaartitsinerit, atuakkiorneq pillugu oqalugiarnerit, illuliortaaseq aammalu ilusilersukkanik sanalukkanillu saqqummersitsinerit ilaatigut ingerlanneqassapput.
Julie Edel Hardenberg Kalaallit Nunaannit peqataavoq.
Aaqqissuussineq Londimi Southbank Centre-mit aningaasalersorneqartoq, Nunanilu Avannarlerni Ministerit Sinnersuisoqatigiiffiata suliniut 5 millioninik tapiffigigaat namminersorlutik oqartussat paasissutissiissutigaat. Taakkualu saniatigut nunani avannarnerlerni kultureqarnermut aningaasaateqarfiit kiisalu Nordisk Kulturfond tapersiipput.