NunaMinerals
Nunamineralsip akiliisinnaajunnaarnermut Ole Christiansen pisuutippaa
Nunamineralsip siulersuisuni siulittaasup Christopher J. Williamsip selskabip pisortarisimasaa, selskabip akiliisinnaajunnaartutut nalunarutigineqarnissaanik piumasaqarsimasoq, oqaatsit sakkortuut atorlugit saassuppaa
Selskabi maanna nalunaarpoq Ole Christian akissuteqarfigalugu piumasaqarfiginiarlugu isumaliutigigitsik. Tamanna ingerlatsiviup nittartagaatigut nalunaarutikkut paasissutissiissutigineqarpoq.
– Tupigusuppugur Ole Christiansenip kisimiilluni selskabip akiligassaqarfiinut piginnittuinullu periarfissat aserorterniarmagit, kanngusugani aningaasanik piumasaqarluni, tunngavilersuutit akiligassaqarfiit piginneqataasullu amerlanerpaat narrujuumminartutut isigisaat, tunngavilersuutigalugit, oqaaseqaammi allassimavoq.
Nunaminerals tallimanngormat Kalaallit Nunaata Eqqartuussisuuneqarfiani akiliisinnaajunnaartutut nalunaarutigineqarpoq, Ole Christiansenip akiliisinnaajunnaartutut nalunaarutigineqarnissaanik piumasaqaataa tunuliaqutaralugu.
Nunaminerals naapertorlugu Ole Christiansen soraarniuteqarnermi piffissamut, 2015-imik januaarip aallaqqaataaniit 2016-imi januaarip aallaqqaataanut, akissarsiassaminik kiisalu immikkut qaammatini 12-ni akissarsiassaminik, katillugit 2,5 millioner koruuninik, piumasaqarsimavoq.
– Aningaasanik piumasaqarani unneqqarissuliorneq tassaassagaluarpoq ingerlatsiviup akiliisinnaajunnaartingajassimanera akiligassaqarfinnut piginneqataasunullu utoqqatsissutigissallugu, tamatumalu kingorna ingerlatsiviup pilersinniarneqaqinnerani suleqataalluni, nalunaarummi allassimavoq.
Ole Christiansen oqaaseqartissinnaasimanngilarput, siusinnerusukkulli KNR-mut oqarnikuuvoq namminerminut aningaasat apeqqutaanngitsut, innarlerneqannginnissanili pillugu.
Nunaminerals naapertorlugu ingeerlatsiviup pilerseqqinnissaanut pilersaarusiortoqarsimavoq, taannalu akiligassaqarfiit 50-t amerlanersaanit, selskabimi 40 millioner koruunit missaannik pisassalinnit, taperserneqarsimasoq.
Pilersaarutigineqarsimavoq 120.000 koruunit inorlugit akiligassaqarfiit pisassatik piumaaraat aktianik niuerneq aallarteqqinneqarpat. Amerlanerusunik akiligassaqarfiit ukiut marluk ingerlaneranni pisassatik kvartalikkaarlugit pisassavaat. Akilersuinerullu unitsinnerata nalaani akiligassaqarfiit pisassatik tamaasa pissagaat.
Selskabi ilanngullugu nalunaarpoq akiliisinnaajunnaarnermik aalajangiinerup eqqartuussivimmut qaffasinnerusumut ingerlateqqinnissaa isumaliutigineqartoq.
– Ingerlatitseqqissanerlunta ingerlatitseqqissannginnerlutaluunniit aalajangerumaarpugut Nasdaq oqaloqatigeqqereerutsigu, nalunaarummi allassimavoq.
Nunaminerals aalajangiinerup ingerlateqqinnissaanut juulip 14-iannut piffissaqarpoq.