NunaMinerals
Nunamineralsimi piginneqataassuteqarnerpaap tullia akerliulluni taasilerpoq
Lønmodtagernes Dyrtidsfondi, Nunamineralsimik piginneqataassutsit 17 procentiinik pigisaqartoq, siulersuisut allatut aaqqiissutissatut siunnersuutaannut immikkut ataatsimeersuarnermi sisamanngorpat taasiniarpoq
Naalakkersuisut aamma Namminersorlutik Oqartussat malartaattunik akerlilersorneqassagunarput aatsitassarsiorfik ajalusooqqajaasoq Nunaminerals A/S immikkut sisamanngornermi januaarip 29-ani ataatsimeersuartitsilerpat.
Ataatsimeersuarnissarmi pingaaruteqartunik aalajangersaaffiusussaq sioqqullugu Lønmodtagerners Dyrtidsfond, Nunamineralsimi piginneqatiginnissutsip 17 procentiinik pigisaqartoq, Namminersorlutik Oqartussat siunnersuutaannut itigartitsiniarluni nalunaareerpoq.
- Nunamineralsip sisamanngornermi ataatsimeersuartitsinissaanut Namminersorlutik Oqartussat siunnersuutaannut itigartitsinermut, kisiannili siulersuisut allatut aaqqiissutissatut siunnersuutaannut akuersisussamik immikkut piginnaatitsissummik tunniussaqareerpugut. Tamatumunnga tunngaviuvoq aatsitassarsiorfiup ineriartoqqinnissanut nutaanik aningaasaliiffigineqarsinnaaneranut periarfissikkusukkatsigu. Tassa taamaalilluni siulersuisut suleqqinnissaminnut periarfissinneqaqqissapput, Lønmodtagernes Dyrtidsfondimi pisortaq, Dorrit Vanglo nassuiaavoq.
Kisianni pisortaanerup oqaatigaa tamanna isumaqanngitsoq Lønmodtagernes Dyrtidsfondi immikkut aningaasaleeqqinniartoq.
Atuaruk: Nunamineralsip aatsitassarsiornermut akuersissutaatini tunniukkaa
Atuaruk: Kim Kielsen: Nunamineralsimik naakkittaatsumik tigusiniartoqanngilaq
2/3-delimik amerlanerussuteqartariaqarput
Nuummi Hotel Hans Egedemi immikkut ataatsimeersuartitsinissaq sioqqullugu Nunaminerals Namminersorlutik Oqartussat aaqqissuusseqqinnissamut siunnersuutaannut arlalinnut nakkaannartariaqarnikuuvoq, Københavnillu børsiani Nasdaq OMX-imit aatsitassarsiorfiup nalunaarsorsimajunnaarnissaanut piumasaqaat avissaartuutsitsivoq. Namminersorlutik Oqartussat aatsitassarsiorfik tassani nalunaarsorsimajunnaartikkusuppaat.
Akerlianilli Nunamineralsip siulersuisuisa - tassa Lønmodtagerners Dyrtidsfondikkormiut - nalunaarsorsimajunnaarnissaq akerleraat, nalunaarsorsimajunnaarnerummi suliffeqarfiup nutaanik aningaasaliisussarsiornissaa killilissammagu.
Siunnersuutigineqartut taakkua marluk taasissutigineqalerpata, piumasaqaataavoq minnerpaamik agguaqatigiisillugu 2/3-imik amerlanerussuteqartoqarnissaa, siunnersuutigineqartoq atuutsinneqalissappat.
Naalakkersuisut siulittaasuata Siumumeersup Kim Kielsenip Namminersorlutik Oqartussat Sermitsiap allaaserisaqarsimaneratut Nunamineralsimik naakkittaatsumik tigusiniarsarinngitsut oqarnikuuvoq.
Atuaruk: Nunaminerals ernumanartumik ataatsimiittoqalinnginnerani assuaraa
Atuaruk: Nunaminerals nakkaattuulerpoq
Namminersorlutik Oqartussat amerlanerpaanik, tassa 33,41 procentinik, piginneqatiginnissutinik pigisaqarput. Piginneqatiginnissutinik amerlanerpaanik pigisaqartut aappaat tassaapput Lønmodtagernes Dyrtidsfond aamma Nykredit Bank, taakkua piginneqatiginnissutit 16,89 procentiinik aamma 9,71 procentiinik pigisaqarmata.
Piginneqataasuaqqat 3.000-t allat, amerlasuut nunatsinni najugallit, piginneqatiginnissutit sinneri, tassa 40 procentit pigaat.
Nunamineralsi pillugu allaaserisat allat uani atuakkit