NunaMinerals
Nunaminerals pillugu Naalakkersuisut paasissutissaataat IA-mit amigarineqarpu
Inatsisartuni Aningaasaqarnermut Ataatsimiititaliami Nunaminerals pillugu suliami Naalakkersuisut tamakkiisumik paasissutissiisimannginnerat IA-mit Naaja Nathanielsenimit uggornartinneqarpoq
- Ajoraluartumik Aningaasaqarnermut Ataatsimiititaliami sulinitsinni paasissutissat pisariaqartut tamaasa pissarsiarisinnaasimanngilagut, taamaattumik paragraf 37 Naalakkersuisunut apeqquteqarsinnaaneq atorlugu paasiniaavunga. Tamannalu ajuusaarutigaara suleqatigiinnginnermik takussutaassappat.
Inatsisartuni ilaasortaq Inuit Ataqatigiinnit Naaja Nathanielsen Nunamineralsip inissisimanera pillugu oqarpoq.
- Suleqatigiinneq ingerlalluassappat pisariaqarpoq paasissutissat agguataarneqartarnissaat kiisalu illuatungeriit aaqqiissutissanut assigiinngitsunut ammasuunissaat. Ingammik pisortat aningaasaataannut tunngassuteqaraangata.
- Una suliaq nukingernartuummat neriuppunga Naalakkersuisut uku apeqqutit akiaarnissaat pingaartilluinnassagaat, IA-mi politikkeri allappoq. Sermitsiaq.AG-mut ilisimatitsivoq Aningaasaqarnermut Ataatsimiititaliamit paasissutissanik amigaateqartut.
Taamaattumik Naalakkersuisunut paragraf 37 naapertorlugu apeqquteqarpoq:
- Inatsisilerinikkut akornutissaqarpa Nuna Minerals-ip aningaasat attortugaasa utertinnissaannut piffissaliussap sivitsorneqarnissaanut?
- Naalakkersuisut uppernarsarsinnaavaat aningaasaleerusuttumit isumaqatigiinniutaasinnaasumik tunniussisoqarsimasoq ullulikkamik 7. Februar 2015?
- Naalakkersuisut isumaqarpat Nuna Minerals annaanniarlugu allatut aaqqiissuteqarsinnaanermut periarfissat tamaasa misissorluarsimallugit, aningaasaliisut annikinnerpaamik annaasaqarnissaat siunertaralugu?
- Naalakkersuisut uppernarsarsinnaavaat Aningaasaqarnermut Ataatsimiititaliami Naalakkersuisut Siulittaasuata tusarniaaffigineqarnerani 9. Februar periarfissanik allanik saqqummiisoqarsimanngitsoq?