akiliisinnaajunnaarneq
Nunaminerals piffissaq kingulleq atorlugu annaanneqariarpoq
Aatsitassarsiornermi misissueqqissaartarfiup Nunamineralsip siulersuisuisa nalunaarutigereerpaat suliffeqarfik akiliisinnaajunnaartoq, kisianni suliffeqarfiup Greenland Rare Earth Projects-ip Nunaminerals suli annaanniarsaraa
Nunaminerals A/S-imi siulersuisut sapaatiummat nalunaaqutaq 17.37 nalunaarutigaat suliffeqarfik akiliisinnaajunnaartoq.
Taamaasilluni Namminersorlutik Oqartussanit ilaannakortumik pigineqartoq akiliisinnaajunnaarnini nalunaarutigaa.
Kisianni suli neriuutissaqarpoq, tassami suliffeqarfimmit Greenland Rare Earth Projects-imit pisortaasup Patrick Newmanip KNR-imut oqaatigaa Nunaminerals suli annaanniarneqartoq.
- Taamaanga killikkatta ajuusaarpugut, kisiannili arlaatigut aningaasanik pissarsinissaq suli periarfissaasoq isumaqarpugut. Tassami suliarereersimasarpassuagut asuli annaaginnarusunngilagut. Ingerlariaqikkusuppugut aammalu ilimagaara danskit piginneqataassutillit isumaqataassasut, Nunamineralsimut aningaasaliissuteqarlunilu sulisussarsiuussisartoq Patrick Newman oqarpoq.
Patrick Newman Nunamineralsimut aningaasaleeqataanikuuvoq suleqataanikuullunilu, taamaammallu suliffeqarfimmut ataannarnissaanut aaqqiissutissamik maanna suliniuteqaleruttorpoq.
Nunamineralsip siulersuisuini siulittaasoq Birks Bovaird sapaatiummat ilaatigut ima tusagassiutinut nalunaaruteqarpoq:
'Suliffeqarfiup pisussaaffini angusinnaajunnaarpai, suliffeqarfik akiliisinnaajunnaarpoq.
Tamaanga killittoqareersoq inatsisitigut maleruagassaasut pisussaaffiit angujumallugit suliffeqarfik akiliisinnaajunnaarluni nalunaaruteqarpoq Kalaallit Nunaata Eqqartuussivianut. Suliaq pilertortumik suliarineqassaaq'.