aatsitassat
Nunaminerals akiliisinnaajunnaartutut nalunaarutigineqarpoq
Kalaallit Nunaata Eqqartuussisuuneqarfiata aatsitassanik ujaasinermik selskabi Nunaminerals akiliisinnaajunnaartutut nalunaarutigeqqammerpaa
Ukiualunnguit matuma siornatigut Nunaminerals ujaasinermik selskabini ingerlatsinerpaajusimavoq, ullumikkulli killissani tikissimagunarpaa.
Akiligassaqarfiit tamaasa sinniisuuffigai
Tassami Kalaallit Nunaata Eqqartuussisuuneqarfiata ingerlatsivik akiliisinnaajunnaartutut nalunaarutigeqqammerpaa. Taamatut Radiavisi oqaluttuarpoq.
Eqqartuussissuserisutut ingerlatsivik Advokatfirmaet Malling og Hansen Damm Nunamineralsimut nakkutilliisuuvoq, taamaattumillu ingerlatsiviup maanna akiligassaqarfiit tamaasa sinniisuuffigilerpai.
Ingerlateqqinneqarsinnaavoq
Imaassinnaavoq Nunamineralsip aalajangiineq ullualunnguit ingerlaneranni nammineerluni eqqartuussivimmut qaffasinnerusumut ingerlateqqikkusussinnaagaa.
– Naatsorsuutigaara Nunamineralsip aalajangiineq ullualunnguit iluanni ingerlateqqikkumaaraa, tamanna kissaatigigunikku, Niels Hansen Damm, Advokatfirmaet Malling og Hansen Damm-imeersoq KNR-mut oqarpoq.