nunalerineq
Nunalerinermut siunnersuisoqatigiit akiitsut isumakkeerneqaqquvai
Kalaallit nunalerisut ilarpassui ima akiitsoqartigaat taarsigassarsiatik akileruminaatsillugit.
Namminersorlutik Oqartussanit inuussutissarsiornermut taarsigassarsiat taarsersornissaat nunalerisut ilaasa ajornartorsiutigaat, taamaattumillu Nunalerinermut Siunnersuisoqatigiit Naalakkersuisunut inassutigaat taarsigassarsiat tamaasa ilaalluunniit isumakkeerfigeqqullugit.
– Nunalerinermut Siunnersuisoqatigiit Naalakkersuisunut taamatut qinnuteqarput, siusinnerusukkullu akiitsutsunik sukkanerpaamik isumakkeerinninnissamik aalajangernissaannut piumasaqaanni nangeqqillugu. Piumasaqaat tamanna Nunalerinermut Ataatsimiititaliarsuup isumaliutissiissummini inassuteqaataasa pingaarnerpaat ilagaat, Nunalerinermut Siunnersuisoqatigiit tusagassiorfinnut nalunaarutikkut allapput.
Nunalerisulli ajornartorsiortut akiitsuisa isumakkeerfigineqarnissaannut inatsit allanngortittariaqarpoq, taamaattumillu Nunalerinermut Siunnersuisoqatigiit kajumissaarutigaagt kingusinnerpaamik 2017-imi ukiakkut ataatsimiinnermi inatsisip allannguutissaanik siunnersuuteqartoqassasoq.
– ESU-mut taarsigassarsiatoqqat isumakkeerfigineqarnerisigut savaatilinnut ajornartorsiornerpaanut akunnattumillu ajornartorsiortunut aporfissat erloqinartut aningaasatigullu ajornartorsiutit annikillisinneqassapput, taamaasillunilu ineriartornissamut aalajaallisarnissamullu inissaqalerluni. Suliniutikkut aamma naatsorsuutigineqarpoq kinguaariit nikinnissaat ajornannginnerulissasoq nukiillu nutaat nunalerinermik inuussutissarsiuteqalerlutik, Nunalerinermut Siunnersuisoqatigiit allapput.
Savaateqarfimmiit savaateqarfimmut aningaasarsiat nikerartorujussuupput, 2014-imili aningaasarsiat agguaqatigiissillugu 826.000 koruuniusimapput, taakkunannga 159.000 koruunit pisortanit tapiissutaallutik. Tassa isertitat 19 procentii, Nunalerinermut Siunnersuisoqatigiit paasissutissiipput.