Nunalerinermi allaffissornikkut ingerlatsivik sumiiffimmi nunaleriffiusumiittariaqarpoq

- Naalakkersuisut kajumissaarumavagut allaffissornikkut nutaamik aaqqissuuseqqullugit nunalerinermillu allaffissornikkut aqutsineq maanga Kommune Kujallermut nooqqullugu. Tamatumanilu Narsaq inissiivissatut naleqqulluartutut takorloorsinnaavara. Nunalerinermik allaffissornikkut ingerlatsivik piffimmi nunaleriffiusumi inissisimasariaqarpoq.

Taama Siumup siulittaasuata tullia Kommune Kujalliullu borgmesteria Jørgen Wæver Johansen Savaatillit Peqatigiit Suleqatigiissut ukiumoortumik ataatsimeersuarneranni ippassaq oqalugiarnermini kaammattuuteqarpoq. Borgmesteri Kujataani nunalerinermut atatillugu unammilligassat kissaatillu eqqarsaatigalugit sorpassuarnik tikitaqarpoq. Isumalluarnartunik pisorpassuaqareersimavoq. Tamarmiunngillalli.

- Angusat maannamut ajunngeqaat nassuerutigisariaqarparpulli siunissamissaaq annertuunik ilungersuutissaqaratta. Nunarsuaq minnerusutut ilisimavoq, nunalerinermilu tunisassianik avataaniit eqqussukkanit unammillerneqarneq sakkortusisimaqaaq – naatsorsuutigisariaqarparpullu siunissami unammillerneq suli annerulerumaartoq. Isumaqarpungalu ataasiinnarmik qinigassaqartugut, tassalu naleqqussartuartariaqartugut pingaartumillu inuussutissarsiut ineriartortinniarlugu nammineerluta siuartartuusariaqartugut, taamaaliussaguttalu kikkuugaluaruttaluunniit tamatta suleqatigiittariaqarpugut, Jørgen Wæver Johansen oqarpoq, savaaqqallu Neqimi tunisassiarineqartartut ukiuni makkunani assersuutigalugu ikiliartornerat erseqqissaatigalugu.

- Imaanngitsoq tunisassiorneq ajorseriarsimammat, kisiannili savaatillit ilaasa uninniarlutik aalajangertarnerat pissutigalugu. Isumaqarpunga pissutsit piaarnerpaamik illuanut saatsinniartariaqarivut, ilorraap tungaanut saatsillugit tunisassiorneq annerulersittariaqarparput. Aamma Kommune Kujalleq savaateqarfinnik unissimasunik aallartitseqqinnissamut aningaasanillu pissarsiniarnissamut peqataassalluni piumassuseqarpoq, Jørgen Wæver Johansen oqarpoq, tamatumalu saniatigut naatitanik tunisassiornerup annertusinissaanik, narsaaterpassuit iluaqutigineqarnerulernissaannik minnerunngitsumillu aqquserngit ineriartortinnissaaannik, siunissami ineriartornermut oqinnerulersitsisussamik, kissaateqarluni. Borgmesteri Kujataani aqqusinniornermut immikkut aningaasaliissuteqartoqarnissaanik kaammattuuteqarpoq.

- Tusarniaanermi akissuteqarnitsinni oqaatigeriikkatsituut Qanisartuunit Eqaluit aqqutigalugit Alluitsup Paanut atassuteqalersillugit, Qassiarsuk Narsarsuarmut aqqusinermik pitsaasumik ikaartarfinnillu atassuteqalersillugu kiisalu Igaliku Sissarluttumut immaqalu siunissami Qaqortumut attaveqalissalluni. Takorluuisinnaassuseqartariaqarpugut, takorluukkavullu piviusunngortittariaqarpavut, politikeri nuimasoq oqarpoq, oqalugiaatinilu naggaserlugu aatsitassarsiornikkut periarfissat Kuannersuarnilu uranimik saniatigooralugu tunisassiulersinnaanermut periarfissat pillugit isumaliutiminik saqqummiussaqarluni.

- Isumaqarpunga inatsisit Nunatsinni atuuttut qulakkeertaareeraat inunnut, sulisunut, uumasunut avatangiisinullu innarliisumik pisoqassappat, taava aatsitassarsiortoqarsinnaassanngitsoq. Puigussanngilarpulli aamma uagut nunarsuarmioqataagatta, uagullu aamma akisussaaqataagatta nunarsuatsinni silaannaap mingutsinneqariartuinnarneranut akiuiniarnermi – suleqataasinnaagutta, suleqataasariaqaratta. Aamma tamatta inuiaqatigiinni akisussaaqatigiippugut, tamattalu pisinnaatitaaffeqarlutalu pisussaaffeqaratta – tamanna soorunami aamma inuutissarsiummik nunaateqarnermik ingerlatsisunut atuuppoq. Aaamma isumaqarpunga aatsitassarsiornermut annertuumik akerliusut oqaluttuuttariaqassagaatigut tamatumani periarfissat isumatusaartumik atorneqassanngippata, taava suna, qanorlu allatut suliffiit, akileraarutillu, maani pisariaqarteqisagut – qanoq iliornikkut pissarsiarineqassanersut, Jørgen Wæver Johansen oqarpoq.