Pilersaarusiorneq
Nuna tamakkerlugu pilersaarusiaq taamaatiinnarneqarpoq
Kim Kielsen isumaqarpoq pilersaarusiakkut nunaqarfiit siunissaat ingasappallaamik killilersorneqartoq
Siullermik nuna tamakkerlugu pilersaarusiap Inatsisartuni oqaluuserineqarnissaa kinguartinneqarpoq, kalaallisuuata qallunaatuuatalu assigiinngissuteqarnerat pissutigigunarlugu. Maannalu politikkikkut tunngavilimmik pilersaarusiaq taamaatiinnrneqarpoq, taamatut paasissutissiivoq KNR.
Akerleriissutaasoq
Nuna tamakkerlugu pilersaarut assortuussutaalereernikuuvoq, pissutigalugu nunaqarfiit, napatiinnarnissaannut inuiaqatigiit aningaasarsiornerannik artukkiisut, matuneqarnissaannik oqallinnissamik siunniussimmat.
Naatsorsueriaaseq tamanna assuarineqaqisumut G-60-politikkimut assinguvoq, taamanikkut qallunaat nunasiaatillit nunaqarfinnik matooraammata inuilu pinngitsaalillugit illoqarfinnut nussortillugit.
2017-imi
Taamaasilluni Naalakkersuisut siulittaasuat Kim Kielsen marlunngormat unnukkut Qanoruumut oqarpoq nuna tamakkerlugu pilersaarummik nutaarluinnarmik sanasoqassasoq, 2017-imi oqaluuserineqartussamik.
Kim Kielsenillu taamatut aalajangernermut tunngavilersuutigaa, maanna pilersaarusiami nunaqarfiit siunissaat ingasappallaamik killilersorneqarsimanera.