innarliineq
Nuna tamakkerlugu katersuiniarnermeersut millionit siunertaminnut atorneqalerput
Marsip qaammataani nuna tamakkerlugu katersuiniarnermi 1,65 millionit koruunit katersorneqarput. Nakuusap meeqqanut kinguaassiutitigut innarligaasimasunut akiuniarnermut pitsaanerpaamik qanoq atorneqarsinnaanersut maanna pilersaarusiuleruttorpaa.
Naatsorsuutigisamik katersat amerlanerujussuupput. Nuna tamakkerlugu katersuiniarneq ingerlanneqarmat, 1,65 millionit koruunerpassuit katersorneqarput.
Nakuusap maanna siunertat anguniarlugit aningaasat pitsaanerpaamik qanoq atorneqarsinnaanerat paasinialeruttorpaat, tassa meeqqat kinguaassiutitigut innarlerneqartarnerat.
Aamma atuaruk: Nuna tamakkerlugu katersuiniarnermi aatsaat taama annertutigisumik katersisoqarpoq
Tamanna siunertaralugu pingasunngormat Nakuusap ilisimannillutik suliaqartut assigiinngitsorpassuarneersut 16-it Nuummi ataatsimoortillugit isummersoqatigiitsippai, suliniaqatigiiffik tusagassiuutinut nalunaarummi allappoq.
Nakuusami siunertarineqarpoq ilisimannillutik suliaqartut pitsaasumik attaveqatigilernissaat. Taamatuttaarlu pingaartinneqarpoq peqataasut assigiinngitsorpassuarninngaannernissaat; Namminersorlutik Oqartussaniit, kommuniniit, NGO-niit, sulianik ingerlatsisuniit, kriminalforsorgimiit peqqissutsimut attaveqatigiinnerullu iluani suliaqartuniillu.
- Pissarsilluaqaagut, uppernarsilluarparpullu ajunngitsumik toraagaqarluta suliniut ingerlakkipput. Maluginiaqqissaarparpullu suliniuteqartoqartareernikuusoq. Suliniutit kaammattueqataaffigisassagut ilikkagaqarfigisassagullu, Arnavaraq Jørgensen Nakuusami aaqqissuussinermik aqutsisoq taamak oqarpoq.
- Pingaaruteqarluinnartuuvormi suut paasissutissiissutigineqarnersut qanorlu saqqummiunneqarnersut. Ilisimasanik paasissutissiinerup ilusaata naqissusertarpaa oqariartorfigineqartut qanoq paasissutissiinerit tiguneraat qanorlu siunissami atussaneraat.
Paasititsiniaanerup ilaatigut ilaqutaasut aamma qanigisaasut allat kinguaassiutitigut innarliinernut takussutissanik takunnissinnaanissaq sammissavaa.
Ukiup naalernerani Nakuusap nuna tamakkerlugu suliniutaa naammassillunilu saqqummiunneqarnissaa naatsorsuutigineqarpoq.