ilinniartitaaneq
Nuna Tamakkerlugu Ilitsersuisarfimmi pisortanngortoq
Ilinniartitaanermut, Kultureqarnermut, Ilisimatusarnermut aamma Ilageeqarnermut Naalakkersuisoqarfiup 1. januar aallarnerfigalugu Christine Tønnesen Nuna Tamakkerlugu Ilitsersuisarfimmut pisortatut atorfinitsissavaa.
36-nik ukiulik Christine Tønnesen 1. januar aallarnerfigalugu Nuna Tamakkerlugu Ilitsersuisarfimmi pisortanngussaaq.
Namminersorlutik Oqartussat tusagassiuutinut nalunaarummi paasissutissiipput.
Christine Tønnesen 2007-imi aqutsinermut kiisalu pisortatut siulersuinermut cand. merc-imik ilinniagaqarnini naammassivaa. Christine Tønnesen Namminersorlutik Oqartussani pisortatut atorfeqarsimavoq Ini A/S-imilu pisortatut aamma sulisimalluni.
- Nuannaarutigaarput Christine Tønnesen qitiusumik ilitsersuisarfimmi pisortanngormat. Christinep ilinniakkani atorfilittullu misilittakkani tunngavigalugit qitiusumik ilitsersuisarfiup ineriartoqqinnissaanut ilinniartunut iluaqutaasussamik sunniuteqartussanngorpoq. Suleqatigiilluarnissaq Naalakkersuisoqarfimmit qilanaarineqarpoq, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmi pisortaq, Lone Nukaaraq Møller, tusagassiuutinut nalunaarummi oqarpoq.