Nuna tamakkerlugu arfernik angisuunik arfattassat

Kalaallit Nunaata aammalu Arfanniarnermut Ataatsimiititaliarsuup (IWC) ukiuni kingullerni pisassanik aaqqiagiageereersut isumaqatigiittoqarpoq ukioq manna.

Ukiunut sisamanut atuuttumik tikaagulliusaanik, arfivinnik, qipoqqarnik Kitaanilu tikaagullinnut kiisalu Tunumi tikaagullinnut pisassiissut 2015-2018-imut atuuttussaq Aalisarnermut, Piniarnermut Nunalerinermullu Naalakkersuisoqarfik nalunaarutigaa. Pisassiissutigineqartut aappaagu inissivinneqassapput.

Kalaallit Nunaata arfernik angisuunik pisassai Arfanniarnermut Ataatsimiititaliarsuup (IWC), pisassiissutit angissusissaannik aalajangiisartuusup, siunnersuuteqarnera tunngavigalugu aalajangerneqartartut, Naalakkersuisoqarfik nalunaarpoq.

Tikaagulliusaaq
Kitaanut 2015-imi pisassiissutit tamakkerlugit tikaagulliusaat 19-upput. Angallatit tikaagulliusaarniarnissamut teknikkikkut piumasaqaatinik nalunaarutini ataani taaneqartunik naammassinnissimasutut akuerineqarsimasut 1. januarimiit 31. decemberimut tikaagulliusaarniarsinnaapput.

Arfivik
Kitaanut 2015-imi arfiviit marluk pisassiissutigineqarput. Angallatit, pingaartumik Qeqertarsuup Tunuani angerlarsimaffeqartut arfivinniarnissamut teknikkikkut piumasaqaatinik nalunaarutini ataani taaneqartunik naammassinnissimasutut akuerineqarsimasut 1. aprilimiit 31. decemberimut arfivinniarsinnaapput. Piniarnerup isumannaatsumik ingerlanneqarnissaa eqqanaarniarlugu ukiut siuliinitut piumasaqaatinik piumasaqartoqassaaq Namminersorlutik Oqartussat, Kommunet aamma piniartut akornanni suleqatigiilluarnissamik piumasaqartumik.

Qipoqqaq
Kitaanut 2015-imi qipoqqartassiissutit tamakkerlutik quliupput. Angallatit qipoqqarniarnissamut teknikkikkut piumasaqaatinik nalunaarutini ataani taaneqartunik naammassinnissimasutut akuerineqarsimasut 1. januarimiit 31. decemberimut qipoqqarniarsinnaapput.

Tikaagullik
Kitaa
2015-imi Kitaani tikaagullittassat tamakkerlutik 164-iupput. Angallatit kiisalu ataatsimoorussamik tikaagullinniarnissamut teknikkikkut piumasaqaatinik nalunaarutini ataani taaneqartunik naammassinnissimasutut akuerineqarsimasut 1. martsimiit 30. novemberimut tikaagullinniarsinnaapput.

Tunu
2015-imi Tunumi tikaagullittasiissutit tamakkerlutik 12-iupput. Ataatsimoorussamik tikaagullinniarnissamut teknikkikkut piumasaqaatinik nalunaarutini ataani taaneqartunik naammassinnissimasutut akuerineqarsimasut 1. martsmiit 30. novemberimut tikaagullinniarsinnaapput.

Nunatta Kitaanut Tunumullu tamakkiisumik:
Ukiumi tullermi nunap immikkoortukkaarlugit pisassiissutissat pisassiissutinik agguaasartoqatigiit tusarniarneqareerpata tusagassiorfitsigut nalunaarutigineqarumaarput.