kingulerussaq:
Nulianik pinngitsaaliilluni atoqateqartarnerit inatsimmut ilanngunneqartut
Inatsisissatut siunnersuut akuerineqarluarpoq. Taamaalilluni aappariinni kinguaassiutitigut pinngitsaaliisoqaraangat ”nuliaqarnermut akikillisaat” atorunnaassaaq
Pinngitsaaliilluni kinguassiutitigut atoqateqarneq inerteqqutaasoq kialluunniit nalunngilaa. Kisianni maannakkut Kalaallit Nunaanni Eqqartuussisarnermi Inatsimmi aappariinni pinngitsaaliilluni kinguassiutitigut atoqateqartarnerit eqqaaneqarsimanngillat. Tamanna maannakkut allanngortinneqassaaq:
- Qujanartumik. Kiisami inatsit nutarterneqalerpoq. Tamanna pissutigalugu nuannaarnermik talikkaluunniit apparpiarsinnaanngilakka, IA-mi politikeriusimasoq maannakkullu Pinerluuteqarsimasunik Isumaginnittoqarfimmi pisortaasoq Naaja Nathanielsen AG-mut oqarpoq.
Aappariinnani pinngitsaaliineq kisimi maanna inatsimmiittoq
Kinguaassiutitigut pinerluuteqartarnerit pillugit inatsisissatut siunnersuummi allannguut allassimavoq, inatsisissatullu siunnersuut maannakkut tusarniaassutigineqarpoq, ilaatigut Kalaallit Nunaanni Politiinut, Kalaallit Nunaanni Eqqartuussivimmut aamma Pinerluuteqarsimasunik Isumaginnittoqarfimmut.
Inatsimmi paragraf 77-imi ullumikkut imatut allassimasoqarpoq »kinaluunniit aappariinnerup avataatigut nakuusernikkut imaluunniit nakuusernissamik siorasaarinikkut kinguassiutitigut atoqateqartoq imaluunniit allatut atoqatigiinnerunngitsumik kinguaassiutitigut pissusilersortoq eqqartuunneqassaaq”. Oqaatsit siulliit pingasut marlugikkit! Taakku inatsisissatut siunnersuummi peerneqartussanngorput.
Pineqaatissiissut sakkukinnerusoq
Angutit nuliaminnik pinngitsaaliillutik atoqateqarsimasut paragraffit allat malillugit pineqaatissinneqarsinnaagaluarput, ilaatigut nakuusernerit pillugit paragraffitigut, kisianni nalinginnaasumik eqqartuussutit sakkukinnerusarsimapput. Tamannaana nuliaqarnermut akikillisaammik taaneqartarpoq.
Inatsimmik allannguineq pillugu atuaqqigit: