atornerluineq
Nuliamik pinngitsaaliilluni atoqateqarneq inerteqqutaalissaaq
Pinerluttulerinermut inatsit Inatsisartuni akuerineqassappat, aapparisaq akiuussinnaanngitsoq atornerlullugu atoqatigigaanni, pinngitsaaliisutut eqqartuussaasoqarsinnaalissaaq.
Pinerluttulerinermut inatsisip allanngorneqarnissaa akuerineqassappat, taava siunissami aapparisaq assersuutigalugu aalakoorpallaarluni ilisimanngitsoq atoqatiginissaa inerteqqutaalissaaq.
Inummik akiuussinnaanngitsumik atoqateqaraanni imaluunniit allatut kinguaassiutitigut atuigaanni, pinngitsaaliilluni atoqateqartutut eqqartuussaasoqarsinnaasoq, inatsimmi allaqqavoq.
Inummik katissimanngisamik taamatut atornerluigaanni pinngitsaaliilluni atornerluineroreerpoq.
Taamaalilluni iliuuseq unioqqutaasimanngitsoq unioqqutaatinneqalissasoq, Kalaallit Nunaanni Politiit unnerluussisussaatitaanerat nassuiaavoq.
- Eqqartuussissutinik paasinnittaatsimut nutaajunerusumut naapertuunneruvoq, taanna Sermitsiaq.AG-mut oqarpoq.
Tamanna allannguut Danmarkimi ukiut arlallit matuma siorna akuerineqarpoq. Tamannalu Nunatsinni atuutissanersoq Inatsisartut taasissutigissavaat.
- Uiusup imaluunnit nuliaasup aapparisani taamatut atoqatiginninneranik nalunaarutiginnittoqarnikuuneranik ilisimasaqanngilanga. Kisianni inatsit akuerineqarpat taamatut pisoqarsinnaavoq, Morten Nielsen oqarpoq.