miljørigtigt

Nukissiuutinut mingutsitsinngitsunut aningaasaliinissaq pilerinarnerulissaaq

Nukissiuutit ataavartut innaallagissiuutaapput, pissarsivissat nutarterneqarsinnaasut, soorlu erngup nukinga, seqernup qinngorneri anorilu atorlugit sarfaliortartut

Aaqqissuussinerup nutaap namminersortut nukissiuutinut mingutsitsinngitsunut aningaasaliinissaat pilerinarnerulersissavaat isumannaannerulersissallugulu. Aaqqissuussinerup nutaap, Naalakkersuisunit akuerineqaqqammersup namminersortut, suliffeqarfiit sullissiviillu nukissiuutinit ataavartunit innaallagissamik pilersuisunut Nukissiorfinnut aamma Mittarfeqarfinnut tunisinissaat ajornannginnerulersissavaa. Tassami januaarip ulluisa aallaqqaataat aallarnerfigalugu innaallagissamik pilersuisut namminersortut innaallagissiorfiinit sarfamik tigusinissamut pisussaaffeqalissapput, taannalu atuisunut allanut ingerlateqqillugu pilersuutigisassavaat.

Namminersortut nukissiuutaannit mingutsitsinngitsunit nukissiap sinneruttup tuneqqinneqarsinnaalernera, aammalu atuisunut allanut ingerlateqqinneqarsinnaalernera, taamaalillunilu atortut dieselitortut atorlugit innaallagissiap annikinnerulernissaa avatangiisinut silallu pissusaanut nutaarsiassaavoq nuannersoq.

Aaqqissuussineq nutaaq nukissiuutinik ataavartunik piginnittunut namminersortunut, piffissani innaallagissiorfiup sinnilimmik sarfaliorfigisaanni sarfamik atunngisassaminnik tunisinissamut qulakkeerisinnaalernerannik kinguneqassaaq.

Tamatuma peqatigisaanik sarfamut innaallagissamik pilersuisumut tunineqartumut akit innaallagissiortumut namminersortumut naammaginartut ersarissullu atorneqarnissaat nalunaarummi aalajangersarneqarput. Tassalu akiusoq innaallagissamik pilersuisuusup uuliamik atuinissamut sipaagaasa amerlaqatigissavaat, maannakkullu uuliamut akiusoq kWh-mut 1,60 koruunit missaanniippoq. Akit sarfamut namminersortut innaallagissiorfiutaannit innaallagissamik pilersuisumut tunisisarnermut danskit akigititaannut assersuullugit pilerinartumik annertussuseqarput.

Pinngortitamut Avatangiisinullu Naalakkersuisoq Kim Kielsen oqarpoq: ”Nuannaarutigaara, aaqqissuussineq nutaaq atorlugu namminersortut, suliffeqarfiit sullissiviillu nukissiuutinik ataavartunik atuinissaat ajornannginnerulersissinnaagatsigu. Tamanna nukissiuutinut ataavartunut tunngatillugu namminersorluni suliniuteqarnissamut sinaakkutissanik pitsaasunik, avatangiisinut silallu pissusaanut iluaqutaasumik qulakkeereqataavoq”.

Aaqqissuussinerup illoqarfinni, ullumikkut innaallagissiorfinnit dieselitortunit innaallagissamik pissarsiviusartuni namminersortut nukissiuutinut ataavartunut aningaasaliisinnaanerat qularnaannerulersippaa. Tamatuma kingunerisaanik innuttaasut affaasa missaasa periarfissaq nutaaq iluaqutigisinnaalissavaat.

Nukissiuutit ataavartut innaallagissiuutaapput, pissarsivissat nutarterneqarsinnaasut, soorlu erngup nukinga, seqernup qinngorneri anorilu atorlugit sarfaliortartut.

Powered by Labrador CMS