Atorfittaartoq
Nukissiorfiit pisortaat soraalerpoq
Nukissiorfinni pisortaq Henrik Estrup suliffittaartussanngorpoq
Nukissiorfiit nutaamik pisortassarsiortussanngorput. Taama pisoqassaaq Nukissiorfiit ullumikkut pisortaat allamik suliffeqarfimmit allamit neqeroorfigineqarnerminut akuersisimammat.
Henrik Estrup Nukissiorfinni 2011-mi pisortaalerpoq maannalu nutaanik unammilligassarsiorusulerluni.
- Uanga ukiup pingasungajaat nukissiornermi pisortaanertut pissanganartumi aamma piumasaqarfiusumi sulisimavunga suleqatigisanik aamma sulisunik aallussilluartunik avatangiiseqarlunga. Allannguinerit annertuut aqqusaarsimavagut aamma angusaqarsimavugut uanga tulluusimaarutigisinnaasannik. Toqqissisimallunga Nukissiorfinni ingerlatseqqinnissaq aamma maannakkut ingerlanneqartut taamatuttaaq siunissamut ungasinnerusumut ineriartorneq aqutsisuusut sinnerinut qimassinnaavara, Henrik Estrup oqarpoq.
Nukissiorfinni pisortaanertut atorfik piaarnerpaamik saqqummiullugu inuttassarsiuunneqassaaq. Atorfinitsitsinissamut ataatsimiititaliamik pilersitsisoqassaaq Avatangiisinut Pinngortitamullu Naalakkersuisoqarfimmeersunik aamma Nukissiorfinneersunik ilaasortaqartumik, taakku suliassarissavaat Nukissiorfinni pisortaanermik atorfinitsitsinissaq.