ukiumut naatsorsuutit

Nukissiorfiit naatsorsuutitigut pitsaasumik angusaqaqqipput

Ukiuni pingasuni malittuinnarmik Nukissiorfiit naatsorsuutitigut pitsaasumik angusaqarput

Suliffeqarfik nukissiuutinik pilersuisoq 2013-imi pitsaasumik angusaqarpoq ingerlatsinermut tapiissutit ilanngutinnginneranni 11,5 million koruuninik sinneqartoorluni Nukissiorfiit

Suliffeqarfik nukissiuutinik pilersuisoq 2013-imi pitsaasumik angusaqarpoq ingerlatsinermut tapiissutit ilanngutinnginneranni 11,5 million koruuninik sinneqartoorluni.

- Ukiut arlaqartut ingerlaneranni aningaasaqarneq aamma pilersuinermi qulakkeerinninneq qitiutippavut, tamatumalu naammaginarluinnartumik naatsorsuutitigut angusaqartippaatigut, pisortaq Henrik Estrup oqarpoq.

Landskarsip 2013-imi ingerlatsinermut tapiissutai 55,1 million koruuniusut nalunaarutigineqarpoq. Immikkut ittumik isertitat 55,6 million koruuniupput, taakku Upernavimmi innaallagissiorfiup ikuallanneranit taarsigassarsiaapput. Namminerisamik aningaasaatit 2013-imi 66,5 million koruuninik suliffeqarfimmi amerlisinneqarlutik.

Aningaasartuutit ikiliartortut
Akissarsianut aamma sulisoqarnermut aningaasartuutit 2013-imi suli ikiliartorsimapput, tamatumunnga sulisut ikileriarsimanerat pissutaavoq. Sulisut 2011-miilli ikiliartortinneqarput, piffissaq suliffiusoq tamakkerlugu sulisut naatsorsorlugit 392-init 366-inut, tassaasut 6,6 procent.

Nioqqutissiornermut nioqqutissanik atuineq 24,6 million koruuninik 2012-imut sanilliussilluni annikillivoq, annikillisitsineq tassaalluni 10 procenti. Annikillisitsinermut pissutaaneruvoq uuliamut aningaasartuutit ikinnerunerat, naak uuliap akia qaffakkaluartoq. Atuinerup annikillineranut nassuiaat tassaavoq Ilulissani imermik nukissiorfik, aappaatigullu silamik pissuteqartumik kiassaanermik annikinnerusumik nioqqutissiorneq.

Sanaartukkanut aningaasalersuineq
Nukissiorfiit malunnaateqarluartumik sanaartukkanut naliliutinut aningaasalersuivoq, ingammillu imermik nukissiorfinnik sanaartortitsinerup suliffeqarfiup aningaasaqarnera sunniuteqarfigisimavaa. 2013-imi sanaartornermi suliniutinut assigiinngitsunut annertunerusunut annikinnerusunullu 217,9 million koruunit atorneqarput.

- Nalikilliliinerit aamma ernianut aningaasartuutit 338,8 million koruuniupput, naatsorsuutigisatut kaaviiaartitanit 830,1 million koruuniusunit, tassaappullu 41 procentit, tamannalu qaffasissorujussuartut isigineqartariaqarpoq. Suliffeqarfiup aningaasaqarnera eqqarsaatigalugu aammattaaq siunissami aningaasaliissuteqarnerit annertunerusut eqqarsaatigilluaqqaartariaqarpavut, nukissiornermi pisortaq Henrik Estrup oqarpoq.

Nukissiorfiit 2013-imi innaallagissamik aamma kiassaanermik nioqqutissiaata 62 procentia imermik nukissiorfinneerpoq. Naatsorsuutigineqarpoq Ilulissani imermik nukissiorfik ukioq kaajallallugu atorneqariarpat kisitsisip 70 procentimut qaffannissaa.

Siunissaq
Aammattaaq 2014-imi Nukissiorfinni pisortat suliffeqarfimmi aningaasaqarnermik aqutsineq qitiutinniarpaat, taamaattumillu aalajangersimasumik aningaasartuutinut sipaarniutissat 15,1 million koruunit missingersuutini naatsorsuutigineqarput, tassa 2013-imi aningaasartuutaavissunut sanilliussilluni. Tamatumunnga ilutigitillugu pisortat nunap immikkoortuinut tallimanut immikkoortitsinerup kingunerisassaat qilanaaraat.

- Nunap immikkoortuinik pilersitsineq piffissaq ungasinnerusoq eqqarsaatigalugu iliuusissatut pilersaarutip ilagivaa, tassani anguniarneqarpoq suliffeqarfik ingerlalluartoq, inuiaqatigiinnit aningaasaqarnikkut tatineqarnissamut piareersimasoq, aamma tamatumunnga ilutigitillugu suliffeqarfimmut killiliussat pitsaasut pilersinniarlugit teknikikkut ineriartornissamut aamma suliatigut siunnersueqatigiinnissamut periarfissaqarnissaq, nukissiornermi pisortaq Henrik Estrup oqarpoq.

Nukissiorfiit 2013-imut ukiumoortumik nalunaarutaa talerpiata tungaani pdf-inngorlugu takuneqarsinnaavoq

Powered by Labrador CMS