Nukissiorfiit
Nukissiorfiit aktieselskabinngoratarsinnaapput
Nukissiorfiit aktieselskabinngortinneqassappata kingunerisinnaasai Naalakkersuisut misissorpaat
Siumup aamma Atassutip Nukissiorfiit aktieselskabinngortinniarneranik suliniarnertik ingerlatiinnarpaat. Maanna naalakkersuisooqatigiit Inatsisartunut siunnersuutiginiarpaat aktieselskabinngortitsinerup pitsaaqutai sanngeequtaalu pillugit oqallittoqarnissaa.
Siumup siusinnerusukkut siunnersuutigereernikuuaa Nukissiorfiit aktieselskabinngortinneqarnissaat tamannali naalakkersuisooqatigiit siuliinit itigartitsissutigineqarpoq. Maanna naalakkersuisooqatigiit Siumup Atassutillu siunnersuut qaqileqqinniarpaat.
Inatsisartuni oqallinneq
Tamanna marlunngornermi tusagassiortunik katersortitsinermi Naalakkersuisut siulittaasuata Aleqa Hammondip Siumumeersup saqqummiuppaa tassani upernaamut inatsisartut katersornissaannut martsip 18-at aallartittussamut naalakkersuisooqatigiit siunnersuutissaat saqqummiukkamigit.
Oqaluuserineqartussat ilagaat Nukissiorfiit aktieselskabinngussappata pitsaaqutit sanngeequtillu pillugit nassuiaat.
- Nukissiorfiit landskarsimut atajunnaarunik iluaqutigissavaat. Tassami aktieselskabinngornikkut suliffeqarfissuaq taanna siunissamut ungasinnerusumut pilersaarusiorsinnaalissaaq, Aleqa Hammond oqarpoq.
Maannakkulli oqaatigisinnaanngilaa Nukissiorfiit aktieselskabinngornissaannik siunnersuut qaqugu inatsisartunut saqqummiunneqarumaarnersoq.
- Maanna Nukissiorfiit aktieselskabinngornissaat pillugu inatsisartut isummersuutaat tusaaniaqqaarniarpagut, Aleqa Hammond oqarpoq.