Qaffaasoqareersoq
Nukissiorfiit akinik aamma qaffaavoq
Qaffaanermi innaallagissamut aamma kiassaanermut akit qanoq allannguuteqassanersut takukkit
KNI A/S Polaroil aggustip aallaqqaataa aallarnerfigalugu ikummatissanik qaffaavoq.
Ikummatissat akiisa qaffanneqarneqaqqammersut kingunerisaanik septembarip aallaqqaataa aallarnerfigalugu innaallagissamut aamma kiassaanermut akigitinneqartut minnerpaaffiinik aamma qaffasinnerpaaffiinik qaffaasoqarnissaa Nukissiorfiit nalunaaruteqarpoq.
Taamaattumik uuliap akiata qaffannera maanakkut akimit literimut 6,11 koruuniniit literimut 6,65 koruuninut – imaluunniit literimut qaffaammut 0,54 koruuninut Nukissiorfiit akigititaasa qaffasinnerpaaffiinut aamma minnerpaaffiinut sunniuteqassaaq:
Qaffasinnerpaaffimmi akigitinneqartut maannakkut 3,29 koruuniniit 3,47 koruuninut qaffassapput, taakku assigaat kWh-mut 18 oorit.
Minnerpaaffimmi akigitinneqartut 50 procentimik qaffassapput tassa 9 oorinik kWh-mut 1,62 koruuniniit akigitinneqalissalluni kWh-mut 1,71 koruunit.
Kiassaanermut tamarmiusumut akigitinneqartut kWh-mut 0,07 koruuninik qaffassapput. Taamaalillutik innaallagissamik kiassaanermut aalajangersimasumut aamma ungasianit kiassaanermut aalajangersimasumut akigitinneqartoq kWh-mut 0,87 koruuninngussaaq kiisalu innaallagissamik kiassaanermut aamma ungasianik kiassaanermut qaminneqarsinnaasumut kWh-mut 0,82 koruuninngussaaq.
Nukissiorfiit: Qaffaanerit peqquteqarput
Nukissiorfinni controllerip Kim G. Schmidtip akinik qaffaanerit nassuiarpai:
- Nalunaarut tunngavigalugu nalinginnaasumik ileqquuvoq Nukissiorfiit avataaneersut pissutaallutik aningaasartuutit suliffeqarfimmut annertusigaangata akigititaminik qaffaasarnera
Akit nutaat atulertinnatik Naalakkersuisunit akuerineqaqqaassapput. Tamanna aggustip ingerlanerani pissasoq Nukissiorfiit naatsorsuuteqarpoq.
Akinik qaffaanerit Nukissiorfiit nittartagaanni septembarip aallaqqaataanit takuneqarsinnaalissaaq.
Atassut SIK-lu isornartorsiuipput
KNI A/S Polaroil aggustip aallaqqaataa aallarnerfigalugu ikummatissanik qaffaanera Atassummit SIK-miillu isornartorsiorneqarpoq. Inuiaqatigiinnut equngasumik eqquisinnaanera ernumassutigineqarpoq, tassanimi illoqarfinni mikinerusuni kiisalu nunaqarfimmiut eqqorneqarnerpaajusussaammata.