Nukissiorfiit akiisa allanngornerat pitsaasortaqarlunilu uggornartortaqartoq

Innaallagiaq imerlu akikinnerulerpoq, ungasianit kiassarneq akisunerulersoq.

Nukissiorfiit tusagassiutinut nalunaaruteqarput.

Akit allannguuteqarnerat marlunnik pissuteqartoq Nukissiorfinnit oqaatigineqarpoq.

- Kiassaanermut akigitinneqartut qaffannerannut pissutaavoq ikummatissanut aningaasartuutivut ukiup ataatsip matuma siornanit annertunerunerat, aamma oktobarip aallaqqaataanit kiassaanermut akigitinneqartunik qaffaasimannginnerput, taamanikkut akit kingullermik iluarsiiffigaavut, Nukissiorfinni pisortaanerugallartoq Michael Pedersen tusagassiorfinnut nalunaaruteqarluni oqarpoq. Allannguutit Naalakkersuisunit akuerineqarsimasut nalunaarutigaa.

Akit nutaat apriilip aallaqqaataanit atuutilersut:

• Innaallagissamut akigitinneqartut qaffasinnerpaaffiat 8,6 procentinik apparpoq kWh-mut 3,47 koruuninit 3,17 koruuninut. Akigitinneqartut appasinnerpaaffiat 8,8 procentinik apparpoq kWh-mut 1,71 koruuninit 1,56 koruuninut.
• Imermut akigitinneqartut qaffasinnerpaaffiat 6,9 procentinik apparpoq kubikmeterimut 35,49 koruuninit 33,03 koruuninut. Akigitinneqartut appasinnerpaaffiat 8 procentinik apparpoq kubikmeterimut 15,46 koruuninit 14,23 koruuninut.
• Ungasianit kiassaanermut akigitinneqartut 4,9 procentinik qaffapput MWh-mut 810 koruuninit 850 koruuninut. Kiassaanermut qaminneqarsinnaasumut akigitinneqartut 3,7 procentinik qaffapput MWh-mut 752 koruuninit 780 koruuninut.