immap sapiitsuliortui
Nukappiaraq umiatsiaaqqamiittoq napparsimasoq ikiupallanneqartoq
Piffissap sivikitsup ingerlanerani umiarsuup sorsuuteeqqap 'Ejnar Mikkelsenip' nukapiarak aqqaneq-marlunnik ukiulik arfininngormat Ilulissani napparsimmavimmukaatipallappaa
Ulloq arfininngorneq 11. juli 2015, nukappiaqqap aqqaneq-marlunnik ukiullip qularnanngitsumik puigukkiutissavaa.
Umiatsiaaraq nukappiaqqamik napparsimasumik ilaasulik ikioqqummat, qujanartumik sukkasuumik kusanartumillu umiarsuarmi sorsuuteeqqami ‘Ejnar Mikkelsenimi’ inuttat iliuuseqarnerisigut, nukappiaraq Ilulissani napparsimmavimmut apuutipallaneqarpoq.
Arktisk Kommando Facebookkimi ilaatigut ikiuussimaneq pillugu ima allappoq:
‘Qeqertarsuup Tunuani alapernaarsuinermi julip 11-ani Ejnar Mikkelsenip Aasiaat Radioa aamma umiatsiaaqqamiittut inuit ikioqqusut kalaallisut oqaloqatigiittut tusaavai. Ejnar Mikkelsen umiatsiaaqqap sumiiffianut ungasinngitsumiilluni akivoq.
Umiatsiaaqqamiipput inersimasut tallimat aamma nukappiaraq aqqaneq-marlunnik ukiulik napparsimasoq nakorsamik ikiortarialik. Ejnar Mikkelsen sukkasuumik Ilulissani napparsimmavimmut attaveqapallappoq, paasitinneqarlunilu nukappiaraq meningitisimik tunillatsisimanissaa ernumassutigineqartoq. Umiarsuaq qanoq iliornissamik paasitinneqarpoq, qanorlu ilionissmik aalajangersaasoqarpoq.
Umiatsiaaraq malinnik eqqorneqartoq
Ejnar Mikkelsenip umiatsiaaraq Qeqertarsuup kujataaniittoq tikimmagu taanna malerujussuarmik eqqorneqarsimavoq. Taamaattumik umiarsuaq umiatsiaaqqamut oqquffinngorteriarlugu nukappiaraq ilaqutaalu umiarsuarmut ikineqarput umiarsuullu napparsimmaviani passunneqarlutik.
Umiatsiaaqqami aquttoq oqortunik masanngitsunillu atisassaanik tunineqarpoq, taamaaleriarluni Ejnar Mikkelsenip tunuanut pilluni Ilulissat tungaanut ingerlaarpoq.
Akunneq ataaseq affarlu Ejnar Mikkelsen ingerlaareerluni Search an Rescue angallat annanniut Ilulissat avataani aqqarpaat, tassanilu ambulance umiarsuarmi utaqqivoq. Umiatsiaararlu ajoquteqarani apuuppoq.
Ajornakusoortoq
Ejnar Mikkelsenimi peqqinnissamut tunngasunik suliallit umiarsuup napparsimmaviani immikkoortillugit uninngatinneqarallarput, Ilulissani nakorsap meningitisiunnginnerarlugu sianernissaata tungaanut. Ilulissani nakorsap sukkasuumik iliuuseqarneq assut qujagivaa, tassami nukappiaqqap napparsimmavimmut apuunnissaa ajornakusoorsimassagaluarmat ikiuutinngippata.
Ikiuineq 2 tiimit 51 minutsinik sivisussuseqarpoq' Arktisk Kommando Facebookkimi quppernermini allappoq.