Nukappiaraq atisaqarani assiminik Facebookimut ikkusseqquneqartoq

Sermersuumi Politiit siorasaarinermut pinngitsaaliillunilu iliuuseqartitsiniarnermut suliassaq sapaatip akunnerani kingullermi ingerlassimavaat. Suliami tassani nukappiaraq 13-inik ukiulik annersarneqarnissaminut siorasaarneqarsimavoq Facebookimi quppernerminut atisaqarani assiminik ikkussinngippat.

Siorasaarineq politiit paasissutissiinerat naapertorlugu Facebookimi peqquserlulluni qupperniliamit ingerlanneqarsimavoq.

- Politiit suliassaq paasiniaavigalugu piareerpat, siorasaarisorlu, aamma ukiukitsuusoq, kinaassusersillugu. Peqquserlulluni Facebookimi quppernialiaq maanna matuneqareersimalerpoq suliassarlu inunnik isumaginnittoqarfimmut ingerlatinneqareerluni.

Taama Sermersuumi Politiit Pinerluttoqarsimaneranik paasiniaasartuneersoq, Taatsi Lynge-Fleischer tusagassiuutinut nalunaarummigut oqaluttuarpoq.

Attaveqatigiittarfinnik atuinernut isumatusaaqqusisut
Tamatuma saniatigut politiit meeqqanut inuusuttunullu angajoqqaanut meeqqat attaveqatigiittarfinni assigiinngitsuni atuineranni isumatusaaqqusipput.

Aajuku politit siunnersuutaat:

• Inuit ilisarisimanngisat ikinngutit akuerissanerlugit mianersuunneqartariaqartut.
• Imminermut paasissutissat assillu allanit takuneqarsinnaaneri killilerneqartariaqartut. Meeraq ilisimatinneqartariaqartoq paasissutissaq imaluunniit asseq nassiunneqarnermini saqqummersinneqarnermiluunniit siammarteqqinneqarsinnaanera unitsinneqarsinnaajunnaartartoq.
• Meeraq, imminiilliorfigineqarpat, pinngitsaaliniarneqarput, siorasaarneqarput allatulluunniit paasissutissanik imminerminut tunngasunik ingerlatitseqqiitinniarneqarput imaluunnit atoqatigiinnermut tunngasunik assinik pinngitsaaliniarneqarpat, pinngitsoorani angajoqqaminut oqaluttuartariaqartoq.

Tamatuma saniatigut Sermersuumi Politiit angajoqqaat kajumissaarpaat pisunik assigusunik meeqqatit nalaataqarpata poltiinut tunniusseqqullugit.