Nukappiaqqap taliata napereernerata kingorna ullut pingasut qaangiunneranni Nuummukaanneqartoq

Sisimiormiu sisamanik ukiulik Miilu Lundblad Olsen ajutoorneernermi kingorna talini saamerleq napivaa sapaatiummat nalunaaqutaq 12.00-ip missaani.

Biilinik Sisimiut napparsimaviliaanneqapallappoq.

Nukappiaqqap talia qinnguartarneqarpoq nipaallisaatinillu tunineqarluni. Arnaa, Ivalu Olsen, nalunaarfigineqarpoq Nuummukaattariaqartoq marlunngornermilu timmisartumik ilaasussanngortinneqarlutik.

- Anniannginnissaa anguniarlugu paariinnaavippara. Misigisaq sakkortuvoq, ullunilu kingullerni sinnakitsuararsuuvunga, Ivalu Olsen Sermitsiaq.AG-mut oqaluttuarpoq.

Pingasunngornermi aatsaat Nuummukaanneqarpoq
Kisianni Ivalu Olsen erninilu marlunngornermi Nuummukaanneqanngillat. Timmisartortartut sulinissartik tamakkersimagaat kiisalu aamma Nuummut ilaasukippallaartoq Air Greenlandimit nalunaarfigineqarpoq.

- Taamaattoqarmat paasisinnaanngilara. Ullummi ingerlanerani Nuummut timmisartuussisoqareerpoq. Nuummi Sisimiuni napparsimaveqarfinnut aamma Air Greenlandimut sianeqattaaraluarpunga, allalu oqaluutissagiga innersuunneqaqattaarlunga. Nammineerlunga mittarfimmukarpunga ernimmalu taliata qinnguartartinneranut assinga sulisunut takutillugu, tassani aatsaat paasilerpaat qanoq ajortisigisumik pisoqarsimanersoq, Ivalu Olsen oqaluttuarpoq.

Ivalu Olsen erninilu aqaguani, pingasunngornermi, Nuummukaanneqarput, nalunaaqutaq 17.30 tikillutik.

- Tikikkatta ingerlaannaq suliarineqassasoq naatsorsuutigigaluarpara. Kisianni saarngi mamipallattarneri pissutaalluni taliata suliarinissaa ajornakusoorsinnaasoq nakorsaq oqarpoq.

- Ulluni kingullerni misigisagut neriuppunga kikkunnilluunniit misigineqassanngitsoq, Ivalu Olsen oqarpoq.

Nuummi Dronningip Napparsimaviani Miilu Lundblad Olsenip talia saamerleq suliarineqassaaq ullumi pingasunngornermi.

Air Greenland napparsimaveqarfillu oqaaseqartinniarlugit Sermitsiaq.AG sulissuteqarpoq.

Assit marluk takukkit