Litteraturpris
Nuka: Pissanganaqaaq
Nunat Avannarliit Siunersuisooqatigiivi persuarsiorpalaartumik pingasunngornerup unnukkuani nersornaasiinerani Nuka Godtfredsen Mariane Petersenilu nersornaaserneqarsinnaapput
Norgemi Oslomi Operaenimi Nunat Avannarliit Siunersuisooqatigiivisa ukiumoortumik nersornaasiinissaanni pingasunngornerup unnukkuani ingerlanneqassaaq. Eqqumiitsuliortoq Nuka Godtfredsen, ilaatigut 'Ukaliatsiaq'-mik suliarinnissimasoq meeqqat inuusuttunullu atuakkiornermut nersornaasigassatut innersuunneqarpoq.
- Pissangasarujussuuvunga eqqissisimaniarsarivungali. Meeqqanut Inuusuttunullu atuakkiornermut nersornaasigassatut innersuunneqartugut 14-iinnaavugut, tamatta pissangarrappugut, Nuka Godtfredsen Sermitsiaq.AG-p Oslomut aallartitaanut oqarpoq.
Nuka Godtfredsen oqaluttuarpoq meeqqanut atuakkiaminut suliaqarnermini itsarnisarsiooq Martin Appelt katersugaasivimmi sulisoq suleqatigisimallugu.
Mariane Petersen aamma innersuunneqarpoq
- Marluulluta qaaqqusaavugut, marluullutalu Oslomiilluta. Qanga inuusimasut pillugit suliaqarneq pissanganartuaannarpoq, eqqumiitsuliortoq oqaluttuarpoq, ilaatigut 'Andala'-mik 'ataataasoq' oqarpoq.
- Tamakkuninnga suliaqarnermi nunarsuarmi allamiilluni misiginartarpoq. Misissuininni qanga qanoq inuusimanerat misissortarpakka, kiisalu nunatsinni itsarnisarsiuunit nassaarineqarsimasut misissortarlugit, Nuka Godtfredsen oqarpoq.
Siullerpaamik meeqqanut inuusuttunullu atuakkiornermut nersornaasiisoqassaaq.
Mariane Petersenip taalliaani 'Piniartorsuit Kinguaavi' Nunat Avannarliit Siunersuisooqatigiivini atuakkiortunut nersornaammut innersuunneqarportaaq, nersornaasiisarnerlu 1962-imili ingerlanneqarpoq.