Innersuussineq
Nuka Godtfredsen atuakkiortunut nersornaasigassatut innersuuppaat
Titartakkatut nangeqattaartuliap ’Ukaliatsiaq’p, Sermitsiami ilanngunneqartarnikuusup, suliarinnittua Nunani avannarlerni meeqqanut inuusuttuaqqanullun atuakkiortunut nersornaasigassatut innersuunneqarpoq. Titartakkat innersuunneqaatigisai takukkit
Nunani avannarlerni meeqqanut inuusuttuaqqanullu atuakkiortut nersornaasigassatut innersuunneqartut 14-it Nuka Godtfredsen akornanniippoq. Atuagaq titartakkanik suliaasoq 'Ukaliatsiaq' innersuunneqarneranut aqqutissiuisuuvoq.
Atuagaaraq titartakkanik suliaasoq ’Hermelinen’ aamma ’Ukaliatsiaq’mik taaneqartartoq tassaavoq arnamik angakkumik oqaluttuaq. Taassuma ilimmarniarluni angalanermini aqqusaagaanik oqaluttuaq naggueqatigiit inuit 1100-kkunni inuunerannik sukumiisumik takutitsineruvoq.
Titartaasup Nuka Godtfredsenip titartakkani minnerpaartai ilanngullugit peqqissaarluni suliarisimavai. Taamaammat Naalagaaffiup katersugaasivissuani Nunarput pillugu ilisimatusarfimmi Sila-mi piffissarujussuaq atorsimavaa inuit inuunerat paasiniaqqissaarsimagamiuk. Naak oqaluttuaq oqaluttualiaagaluarluni taamaattoq naggueqatigiit inuit siuaasatta inuunerannik takussutissiivoq.
Innersuunneqarneq tulluusimaarnartoq
- Taamaasilluni atuakkami takuneqarsinnaalerpoq atisat, piniarnermi atortut piniariaatsillu sukumiilluinnartumi suliarineqarsimammata minnerunngitsumillu taamanikkut Kalaallit Nunaanni aamma Canadami inuit eqqarsariaasiat pitsaalluinnartumik ersersinneqarsimammat, Nordisk Råd nalunaarpoq.
Nuka Godtfredsenip nersornaaserneqartussatut innersuunneqaqatigaa Martin Appelt oqaluttuap imassaanik isumassarsisuusoq.
- Innersuunneqarnera assorujussuaq tulluusimaarutigaara – minnerunngitsumik pissutigalugu siuaasatta inooriaasiat uani pineqarmat, Nuka Godtfredsen nuannaaqisoq Sermitsiaq.AG-mut oqarpoq.
- Soorunami nerioqaaga nersornaaserneqarumaarluta. Kisianni tassa pingaarneruvoq innersuunneqarnerput, Nuka Godtfredsen oqarpoq.
’Ukaliatsiaq’ kalaallisut, qallunaatut tuluttullu saqqummersinneqarnikuuvoq.