Nuannaarneq: Inatsisitigut ataataqanngitsut ataatsimiititaliap taperserpai

Inatsisitigut ataataqanngitsut ilungersornerat sivisooq inerititaqariartulerpoq. Folketingimi Nunarput pillugu ataatsimiititaliap isumaqatigiissup taperserpaa inatsisitigut ataataqanngitsut ataataqarsinnaanermut pisinnaatitaaffeqartut. Maanna ataatsimiititaliap Danmarkimi naalakkersuisut aamma Nunatsinni Naalakkersuisut kajumissaarpai suliap naammassinissaa suleqatigiissutigeqqullugu.

Atuaruk: Aleqap inatsisitigut ataataqanngitsut suli sukataaruppai

Inatsisitigut ataataqanngitsut pillugit inatsisissatut siunnersuut Folketingimut siorna oktoberimi saqqummiunneqarpoq. Siunnersuutip aappassaanneerneqannginnerani Nunarput pillugu ataatsimiititaliap suliaralugu naammassivaa.

Qulaajaaneq pingaarutilik
- Kiisami inatsisip akuersissutigineqarnissaanut ingerlariaqqissinnaanngorpugut. Oqaluttuarisaanermi pingaarutilimmik alloriartoqartussanngorpoq. Maanna Folketingip inatsisitigut tunngavilikkamik inatsisitigut ataataqanngitsut ataataqarnissamut pisinnaatitaaffeqarnerat akuersissutigisussanngorpaa. Pineqartut tamaasa pilluaqquakka suliaq manna pillugu annertuumik alloriartoqartussanngormat, Nunarput pillugu ataatsimiititaliap siulittaasua Sara Olsvig Inuit Ataqatigiinneersoq isumaliutissiissut pillugu oqarpoq.

Isumaliutissiissutip naammassinerani ataatsimiitsimiititaliap Danmarkimi naalakkersuisut aamma Nunatsinni Naalakkersuisut kajumissaarpai 2011-mi qulaajaneq pingaarutilik nangillugu inatsisitigut ataataqanngitsut pillugit suleqatigiissasut paasissutissat pissarsiarineqarsinnaasut atorlugit inatsisitigut ataataqanngitsut ullumikkut suli inuusut amerlassusaat paasiniarlugu. Ataatsimiititaliap aamma inassutigaa oqaluttuarisaanermi matumani attoqillanneqarsimasut qallunaat, kalaallit aamma savalimmiormiut ilisimatinneqassasut inatsisip allannguutaanik tamatumalu kingunerisaanik pisinnaatitaaffigilikkat pillugit.

- Assorujussuaq nuannaarutigaara ataatsimiititaliap isumaqatigiissup isumaliutissiissut naammassimmagu. Taamaasilluni suleriaqqinnissami Danmarkimi naalakkersuisunut Nunatsinnilu Naalakkersuisunut tunngavissaq tangeqanerulerpoq. Apeqqutilli ilaat suli akissutissarsineqanngillat soorlu inuit qassit matumani pineqarnersut. Maanna naalakkersuisuusut suleqatigiillutik suliaq ingerlateqqittussanngorpaat tassanilu ilanngunneqassaaq kingornussisinnaanermut pisinnaatitaaffik, Sara Olsvig oqarpoq.

Nunarput pillugu ataatsimiititaliap erseqqissarpaa inatsisitigut ataataqanngitsut kisimik uani pineqanngimmata. Aammali inatsisitigut ataataqanngitsut ataataat, anaanaat, qatanngutaat kinguaavilu pisumi matumani attorneqarput. Taamaammat ataatsimiititaliap inassutigaa inatsisip atortuulernerata paasititsiniutigineqarnera Nunatsinniinnaanngitsoq naalagaaffeqatgiinnermili tamarmi ingerlanneqassasoq.