Sprog
Norskit oqaasiinik ukiortaami oqalugiarneq isornartorsiorneqartoq
Sametingimi præsidenti siullermeerluni norskisut ukiortaami oqalugiarpoq. Tamannalu annertuumik qisuariarfigineqarpoq, NRK Sápmi allappoq.
Sametingi 1989-imili pilersinneqarneranit aatsaat siullermeerluni ukiortaami oqalugiarneq saamit oqaasii atorlugit pinngilaq.
Saamit inatsisartuisa præsidentiata Vibeke Larsenip norskisut oqalugiarpoq.
Kanngunarsaasutut nalilerneqartoq
Tamannalu kikkunnit tamanit iluartutut isigineqanngilaq, tusagassiorfik innuttaasunik kiffartuussisoq, NRK Sápmi allappoq.
- Kanngunarsaasutut misinnarpoq, Brita Julianne Skum oqarpoq, taanna Altami saamisut ilinniartitsisuuvoq.
Taassuma sakkortuumik qisuariaateqarnini, kinguaariinni norskisut ilinniartitaasimasunut kingullernut ilaanini tunngavilersuutigaa.
Oqalugiaammi oqaaseq ataasinnguarluunniit saamisoortuunngilaq.
- Sametingilluunniit præsidentiata ukiortaami oqalugiarnermini saamisut "aluu" oqaatiginngilaa, tamanna ajuusaarnarpoq, Brita Julianne Skum oqarpoq.
Atuaruk: Siumup inuusuttai: Qallunaat oqaasiisa akimmisaarpaatigut
TV qamikkaa
Saamisut ilinniartitsisumut tamanna isiginnaarnissaa sapernarsimavoq.
- Tamanna assut tataannaraara. Isiginnaarnissaa saperpara, Brita Julianne Skum NRK Sápmimut oqarpoq. Tamatuma kingorna oqalugiaat nittartakkakkut atuarniarlugu aalajangersimavoq.
Pingajorarterutit norskisut oqaluttut
Kisianni aamma saamit præsidentimut tapersersuipput. Tusagassiortup Jan Gunnar Furulyp oqaatigaa, inuit imminnut saamitut isigisut pingajorarterutaasa oqaatsit atorsinnaanngikkaat.
- Saminik norskisut oqaluttoqarnera akueriinnartariaqarparput, taanna NRK Sápmimut oqarpoq, akaarinninnermut saammaateqatigiinnermullu kajumissaarivoq.
Samtingimi præsidentip, Vibeke Larnsenip norskisut oqaluttut ilaanniinnini illersuutigaa.
Atuaruk: Oqaatsinik ilisimatooq: Tuluit oqaasiisa kalaallit oqaasii akoorsinnaavai
- Saamiuvunga norskisut oqaluttoq. Saamisut atuarlunga oqalugiarsinnaagaluarpunga. Kisianni eqqortutut misigisimanarnavianngilaq, taanna oqarpoq.
Isornartorsiuisut ilaasa, prinsesse Märtha Louise saaminut ilisimasaqanngilluinnartoq, 2001-imi oqaatsit atorlugit tv-kkut inuulluaqqusisimasoq oqaatigaat. Taannali sekundinik 20-innarnik sivisussuseqarpoq.