Norgep kunngissaata nuliatalu helikopterimik ajunaartut ilaqutaat tikeraarpaat

Norgep kunngissaata nuliatalu ministeriunerullu Erna Solbergip, arfininngormat ualikkut ilaqutaasunut centeri, tallimanngormat Bergenip avataani Turøymi helikopterip nakkarnerata kingorna pilersinneqartoq, pulaarniarpaat. Tassani helikopterimi issimasut 13-it ajunaarput.

Centeri Scandic Bergen Airport Hotelimi pilersinneqarsimavoq. Tassani kunngissaq Haakon, kunngissap nulia Mette-Marit ministeriunerlu suliffeqarfissuup Statoil Eldar Sætre-p pisortaanit tikilluaqquneqassapput.

Inuit 13-it ajunaarput

Tamatuma saniatigut kunngikkormiut norskit helikopterimik ajunaarneq pissutigalugu svenskit kunngiata Carl Gustafip 70-iliineranut atatillugu Sverigemut tikeraarnissartik taamaatiinnarpaat.

Helikopteri tallimanngormat ulloqeqqanut Bergenip avataani Turøyp eqqaani nakkarami 13-inik issimasoqarpoq. 11-t toqungasut nassaarineqarsimapput, sinnerilu marluk suli ujarneqarlutik, nutaarsiassaqartitsivik NTB allappoq.

Inunnit 13-init 11-t norgemiuupputd, ataaseq tuluulluni ataaserlu italiamiuulluni. Ataaseq Statoilimi atorfiliusimavoq.

Suliffeqarfissuup pisortaa arfininngormat oqarpoq ingerlatsivimmi Statoilimi aliasunnersuaqartoq.

Suli ilisimaneqanngilaq

– Ippassaq Norgemi selskabittalu oqaluttuarisaanerani ajunaarnerit ajornersaasa ilaat pivoq. Ingerlatsivik Statoil maanna aliasunnersuaqarfiuvoq, suleqatigisavullu eqqorneqartut eqqarsaatitsinniittorujussuupput. Ullumikkut ataatsimut ilaqutariiuvugut ataqatigiissut, Eldar Sætre oqarpoq.

– Aamma qujaruteqaarput kunngissakkut ilaqutariinnut centeri pulaarniarmassuk. Tamassuma takutippaa ilaqutariinnut eqqorneqartunut nuna tamarmi misiginneqataasoq, taanna oqarpoq.

Nakkarneq sioqqullugu helikopterip rotoria katassimavoq. Sulili ilisimaneqanngilaq sunarpiaq pissutigalugu helikopteri nakkarsimanersoq.

Kinaassusersiuineq

Arfininngormat ullaakkut tusagassiortunik katersortitsinermi norskit politiivisa pinerluttorsiortut, Kripos, oqaatigaat ajunaartut kinaassusersiornerat ullunik tallimanik sivisussuseqarsinnaasoq.

– Suliassaq annertoorujussuuvoq ullullu tallimat iluanni naammassineqassaaq, Per Angel, Kripos-ip id-enhed-ianeersoq oqarepoq.

Siusinnerusukkut nalunaarutigineqarpoq issimasunit 13-init 11-t nassaarineqarsimasut. Tamannali Bergenimi politiit uppernarsarumanngilaat.

– Qanoq amerlatigisut nassaarineqarnersut oqaatigisimanngilarput, Bergenimi politiini stabschef Gustav Landro oqarpoq.