Qulimiguulinnik suleqatigiinneq
Norðurflugip aamma Air Greenlandip nukitik kattuppaat
Ataatsimut kattullutik tallimanik qulimiguuliuteqarput takornariaqarnermi siuarsaanermut nukittorsaataasussanik
Air Greenlandip Norðurflugimik suleqateqarnerulernera ingerlatseqatigiiffiit Peqatigiinnissamut Isumaqatigiissutaata ukiunik pingasunik sivisussillip nassatarisaanik Air Greenland piginneqataalerpoq. Taama Air Greenland tusagassiuutitigut nalunaarummi ilisimatitsivoq.
Ingerlatseqatigiiffiit taakkua marluullutik sulianut tunngatillugu qulimiguulinnik suliniutit arlallit suleqatigiissutigisinnaavaat kiffartuussat qanimut suleqatigiitigalugit. Maanna Norðurflugip ineriartornissaanut siuariartornissaanullu pitsaanerpaamik ikorfartuinissartik ingerlatseqatigiiffiit marluullutik anguniagaraat.
- Norðurflugimi Air Greenlandip aningaasaliisunngornera nuannaarutigineqarpoq, ingerlatseqatigiiffinnilu sulisutta pikkorissut akuleriisillugit suleqatigiisinnerisigut siuariartornissarput qilanaaraarput, Birgir Ómar Haraldsson, Norðurflugimi pisortaq oqarpoq.
Michael Højgaard Air Greenlandimi pisortaq itisiliivoq: - Ataatsimoorluta ’long line sling’ atorlugu suleqatigiinnitsigut piginnaasagut akulerutsillugit takornarissanik angallassineq qaffasissoq ingerlassinnaavarput – nutaamillu suleqatigiissuteqalernerput qilanaaraarput.
Ukiut qulit matuma siorna Norðurflugip pilersinneqarnerata kingorna qulimiguullit pingasut atorlugit pitsaasumik siuariartortoqarpoq. Siumut isigisumik Norðurflugip aamma Air Greenlandip qulimiguulinnik niueruteqarnermut atatillugu siuariartorfiusinnaasut tamaasa misissussavaat, tusagassiorfinnut nalunaarummi oqaatigineqarpoq.
Aasaq manna takornariartitsinermi aamma qulimiguullit atorlugit sisorariartitsisarnermi siuariartorneq ikorfartorniarlugu, qulimiguullit tallimat atorneqarnissaat aalajangerneqarpoq. Qulimiguullit pingasut Norðurflugimit marlullu Air Greenlandimit atorneqassapput.
Aammattaaq qaffasissumik kiffartuussinerup attatiinnarnissaa qulakkeerniarlugu, Norðurflugip tuniniaanermi ussassaarinermilu iliuuseqarneq qitiutillugu samminnissinnaaneranik tamanna kinguneqarpoq. Kiffartuussinerup qaffasissusaa sullitanut pingaarutilerujussuusoq paasinarsisimavoq, tamannalu ilaatigut TripAdvisorimi oqaaseqaatinit kusanartunit uppernarsarneqarpoq.
- Anguniagarput tassaavoq 2015-imi qulimiguullit tallimat atorlugit sullitatta pitsaanerpaamik sullinnissaat, Birgir Ómar Haraldsson oqarpoq.