Nordsømi helikopteri nakkarmat inuit sisamat ajunaarput
Canadamiut selskabiata CHC Helicopter Service-p helikopteriumminik Super Puma L2-nik tamanik timmisartoqqusiunnaarpoq
Inuit pingasut ajunaarput ataaserlu maqaasineqarluni, ajunaarsimassangatinneqarlunili, canadalmiut selskabiata helikopteria Super Puma L2 16-inik issimasunik marlunnillu aquttulik tallimanngormat unnukkut Nordsømi nakkarmat, taamatut allapput tusagassiorfiit arlallit.
Helikopterit arlallit annaassiniartillugit aallartinneqarput, issimasunilli 18-init 14-iinnaat, ilaatigut timmisartortartut marluk, annaanneqarput napparsimmavimmullu unitsinneqarlutik.
Arfininngornerup unnuaani annertuumik ujaasisoqarpoq, arfininngornermilu ullaassakkut inuit ipeqqasut pingasut nassaarineqarput.
Inuk ataaseq suli maqaasineqarpoq, naatsorsuutigineqarporli ajunaarsimassasoq.
Arfininngornerup ullaatungaani oqartussaasut ajunaartut sisamat kinaassusersivaat tassaasut tuluit marluk 46-nik aamma 57-inik ukiullit kiisalu arnaq skotlandimiu 45-nik ukiulik angullu skotlandimiu 59-inik ukiulik, taamatut nalunaaruteqarpoq BBC.
Ajunaarnerup kinguninngua canadamiut selskabiat CHC Helicopter Service helikopteriminik tamakkuninnga timmisartoqqusiunnaarpoq, ajunaarnerup sumik pissuteqarnerata paasineqarnissaata tungaanut.
Helikopteri Shetlandsøerne-mi mittarfimmit Sumburgh-imut kilometerialunnguanik ungasissusilimmi imaanut miinnartariaqarsimavoq. Shetlandip sineriaani silarlussimavoq pujorluni sakkortuumillu anorlerluni.
BBC malillugu helikopterip maskiinaa unittooriataarsimavoq imaanullu nakkarluni arlalinngorluni napilluni.
– Ilimanarpoq nakkariataarsimasoq imaanut isumannaatsumik minnissaminut periarfissarani, annaassiniarnermik ataqatigiissaarsisoq Jim Nicholson tv-qarfimmut radioqarfimmullu oqarpoq.
Helikopterip Nordsømi uuliasioqatigiiffiup Total-ip qilleriviinut qilleriviinillu sulisunik assartuisarpoq.
Ajunaarneq Nordsømi piffissami kingullermi helikopterinik ajutooqattaarnerit kingullersaraat. Siorna oktobarimi helikopteri nakkarmat 19-it annapput, maajimilu aamma helikopterinik nutaajunerusunik EC225-nik ajutoortoqarmat inuit 14-it annapput.
2009-mi apriilimi inuit 16-it ajunaarput, helikopteri Super Puma Nordsømi nakkarmat, qillerivimmit nunamukarluni.