Nordatlantens Hus ammangajalerpoq

Odensep umiarsualiviani sanaartugarsuaq 50 millioner koruuninik akilik naammassivoq. Entreprenøritut ingerlatsiviup Hans Jørgensen & Søn A/S-ip illu 3500 kvadratmeterinik angissusilik sapaatip akunnerani kingullermi tunniiuppaa. Maanna sanasut amigaatit assigiinngitsut, taamaattumik sanaartornermi tamatigut pisartut, pitsanngorsaleruttorpaat.
Illup iluani Kalaallit Illuutaanni sulisut allaffissatik piareersaleruttorpaat. Neriniartarfimmi cafémilu puuguttat, tiitorfiit immiartorfiillu inissitilerneqarput ataatsimeersuartarfimmilu teknikerit atortunik ikkussuileruttorput. Ilinniagaqartut kollegiamut nutseraleruttorput.
Nalliuttorsiorpaluttumik ammaanissarsuaq sioqqullugu sapaatip akunnera kingulleq atorneqassaaq inissitassat kingulliit inissinnerannut, suut tamarmik piareersimaqqullugit arfininngorpat tulliani pulaartorpassuit tikeraarpassuillu illumik takuniaappata.
Suliaq pissanganartoq
Suliniummut pisortap Knud Erik Madsenip isertuutinngilaa pingaarnerusutut entreprenørimut Hans Jørgensen & Søn A/S-imut suliassaq pissanganartorujussuusimasoq unammillernarlunilu. Knud Erik Madsen Sermitsiaq.AG-mut ilaatigut oqaluttuarpoq:
– Sanaartukkami sorpassuartigut unammillerneqarsimavugut. Taamaattumik naammassingajaleratta naammagisimaarinnittorujussuuvugut. Soorunami aqqutaani sorpassuaqarsimavoq isummerfigisassatsinnik. Aallaqqaammut sanaartorfissami betonimik napasuliatoqqat ajornartorsiutigisimavagut.
Illorsuup qerittsivikup tassani inissisimasimasup sinnikui. Ukiuunerata sivisunera pissutigalugu kinguaattoorsimavugut, ullulli ilaanni sivisoorsuarmik sulisarnitsigut suut tamaasa angumerisimavagut. Taamaattumik aap, tamaviat tulluusimaarutigilaarparput.
Ammaanersiorneq
Suut tamaasa atorlugit ammaanersiorneq sapinngisamik nalliuttorsiorpalaartinneqassaaq pisoqartitsilluni, aliikkusersuisoqarluni saqqummersitsisoqarlunilu.
Ilulissanit iluliamik tikisitsisoqassaaq. Ilulissamik qiperuisoqassaaq. Vivi Sørensen tivanermik aliikkusersuissaaq. Islandimit skjaldemik tikisitsisoqassaaq, islandimiut hiistiat islandimiullu nipersortartut Lonesome Dukes nipilersussapput soorunamilu savalimmiormiut savalimmiormiutut tasiortiterlutik qitissapput, ammaanersiornissamullu erinarsoqatigiissuarnik atlantikup avannaamiuineersunik pilersitsisoqarsimavoq siulersortigalugit Sigga Eythórsdóttir aamma Aviaja Lumholt.
Eqqumiitsuliortut atlantikup avannaamiut tusaamasaanerpaat saqqummersitsissapput. Kalaallisuunit Fashion-imut Isaksen Designip atisaliaanik takutitsisoqassaaq. Nuersakkanik katiterisitsisoqassaaq taallugu Strik Nordatlantisk. Assinik saqqummersitsineq taaguutilik Nordatlantiske Ansigter, inuit 39-t atlantikup avannaanut attuumassutillit assingi. Uuminnga allaatiginnittumik assilineqarsimasut.
Ammaanersiornermi allunaasaq kipineqartartoq nalunaaqutaq 10.30 kipineqassaaq, Nordatlantisk Hus-illu siulittaasua, rådmand Steen Møller, tikilluaqqusissaaq, taavalu Nordatlantisk Hus soqutiginnittunut tamanut ammarneqassaaq.
Qularutissaanngilaq Odense kulturikkut minnerunngitsumillu atlantikup avannaamiuisa naapittarfiannik peqalersoq, siunissami soqutiginnittunik Odensemut ussatsitsisartussamik, tassanilu nunat atlantikup avannaaniittut nunaminnik ilisimasaqalersitsinisarnissaminnut nalissaqanngitsumik periarfissaqalerput.