Qulerarterutaat maannakkut nunasisunik tunngaveqarpoq

Danmarkimi innuttaasut katiterneqarneranni pingaaruteqartoq qaangerneqartoq Morgenavisen Jyllands-Posten ataasinngormat allaaserisaqarpoq.

Siullermeerlutik nunasisismasut imaluunniit taakku kinguaavisa innuttaasut qulerarterutaat qaangerpaat, tamanna Integrationsministeriamit (nuts. nunasisut pillugit ministereqarfik) nalunaarsuinerup ersersippaa.

1. januaari 2002-miilli, VKO amerlanerussuteqarlutik oqartussanngormatali, nunasisut 147.000-inik amerleriarsimapput maannakkut 562.000-inngorsimallutik.

Amerleriaatsinut tunngaviupput nunasisut, Nyrupikkut naalakkersuisuunerannut sanilliussilluni, katiterneqarneri allaanerusut.

Taamanikkut qimaasut aamma ilaqutariit kattutsinneqartut affangajaat nunasisuupput - maannakkut 15 procentiupput.

Ullummikkut amerlanerit ilinniagaqarnertik aamma sulinissamut akuerineqarsimaneq imaluunniit EU-mi innuttaasutut tikittarput.

Taamaalillutik Kiinamiut, Filippinerit aamma Thailandimiut marloriaatinngorsimapput kiisalu Polenimiut, Litauenimiut aamma Rumæniamiut marloriaammit sisamariaammut amerleriarsimallutik, aviisi allaaserisaqarpoq.

Akerlianik Kangianit Qiterlermit nunasisut ikileriarsimapput kiisalu Somaliamiut hunderedinik marlussunnik ikileriarsimallutik, tamatumunnga pissutaavoq nunamit nuuttut nunamut nuuttunit amerlanerunerat.

Professor Peter Nannested malillugu nunasisut sulisinnaasut pissutaallutik akissarsiakinnerit akissarsiaat tatisimaneqalersimapput, taakku akissarsiaat 4,5 procentimik pisassaraluinit apparsinnerupput.

Akerlianilli ilinniagaqarluartut suli akissarsiassamik tatisimaneqarnerat maluginngilaat, kisianni tamanna takkussinnaavoq it-mik suliallit aamma ingeniørit asiameersut pissutaallutik.

- Tamatuma maannakku malunniunnissaa eqqarsaatigineqarsinnaalluarpoq. USA-mimi ilisimaneqarpoq matematikerit akissarsiaat qanoq annertutigisumik appariartoq, taamanikkut Sovjetunioniusimasumit matematikerit USA-mut nussulillarmata, Nannested Jyllands-Postenimut oqarpoq.