Noma nunarsuatsinni neriniartarfiit suli pitsaanersaraat
Danskit neriniartarfiutaat Noma igaffimmi pisortaq René Redzepi siuttoralugu ukiut tulleriinni marlunni nunarsuatsinni neriniartarfiit pitsaanersaattut toqqarneqarpoq
Nomap igasutut pisortaa, 33-nik ukiulik René Redzepi, tulluusimaarsinnaalluarpoq neriniartarfik Københavnimiittoq ukiut marluk tulleriiginnarni nunarsuatsinni neriniartarfiit pitsaanersaattut Londonimi Guildhallimi akissarsisitsinikkut toqqarneqarnermat.
Nomap nunani avannarlerni nerisassiassat mamartuliarisarpai, danskinit nerisassat pillugit allaaserisaqartartunit siumut taamatut toqqarneqarnissaanut piukkunneqarnera nalunaarutigereerpaat.
René Redzepi Nomami nersornaaserneqarnermi suleqatini peqatigai, tassani aamma nalliusseqqissinnaavaa unammillertiminit spaniamiut neriniartarfiutaannit El Cellar de Can Rocamit aamma tuluit neriniartarfiutaannit The Fat Duckimit pikkorinnerunini.
Tuluit ataqqisaasumik nerisassat pillugit atuagassiaata Restaurant Magazinep ukiut qulissaannik nunarsuatsinni neriniartarfiit pitsaanerpaat 50-it allattorsimaffiat tamanut saqqummiuppaa. Allattorsimaffik suliarineqartarpoq nunarsuatsinni tamanit nerisassat pillugit immikkut ilisimasallit 800-t naliliinerat tunngavigalugu.
- René Redzepi qamannga pisumik pilluaqquniarparput allattorsimaffitsinni ajornaqisumi suli normu 1-uneranik, tamatuma erseqqissarpaa nunani avannarlerni igasarnikkut taassuma nutaaliaasumik eqqarsarsinnaanermut piumassuseqarnera, taamatut allaaserisaqarpoq Restaurant Magazinemi aaqqissuisoq William Drew allattorsimaffiup inerneranik nalunaaruteqarnermini.
Noma siorna aallaaserineqaqaaq spaniamiut neriniartarfiat elBulli ukiuni sisamani tulleriiginnarni normu 1-iusarsimasoq ajugaaffigigamiuk allaaserineqaqaaq. Elbulli maannakkut ilaanngilaq neriniartarfik ukiup matuma ingerlanerani matusussaammat.
- Ukioq manna Nomamut pingaaruteqarsimaqaaq, igasuunerullu René Redzepip aqqa ilisarnaataalerpoq nunarsuatsinni iganermik illersuisutut. Nerisassioriaaseq ungasinngitsut aallartinneqartoq aamma pissanganartoq aalajangersimasumillu siunertaqartinneqartoq, Restaurant Magazinep oqaaseqartitaa oqarpoq.
Restaurant Magazine malillugu René Redzepi nunarsuatsinni uppitinneqarsinnaanngitsoq kunngiuneraraat qaammammi kingullermi Michelin-stjerner agguaanneqarmata igasuuneq aamma Noma marluinnarnik ulloriaasassinneqarput, Ritzau taamatut allaaserisaqarpoq.
Aajuku qulit siulliit:
1. Noma - Danmark
2. El Celler de Can Roca - Spanien
3. Mugaritz - Spanien
4. Osteria Francescana - Italien
5. The Fat Duck - Storbritannien
6. Alinea - USA
7. D.O.M - Brasilien
8. Arzak - Spanien
9. Le Chateaubriand - Frankrig
10. Per Se - USA