Akitsuuteqanngitsunik tuniniaanermik unitsitsineq nalilersorli
Kangerlussuarmi Nunaqarfimmi Aqutsisut nioqqutissanik akileraaruteqanngitsunik eqqussisinnaanerup unitsineqarnerata kingorna aningaasaq qanoq amerlatigisut landskarsip isertissimanerai paaserusuppaat
Nioqqutissanik imigassartalinnik aamma tupanik eqqussisinnaanerup unitsineqarnerata, Kangerlussuarmi Nunaqarfimmik aqutsisut tunngavigalugit, sulisut arfinillit soraarsinneqarnerat kiisalu nioqqutissanik akileraaruteqanngitsunik tunisinerup affaannanngonera kingunerisimavaat.
- Taamaattumik aningaasaqarnermut naalakkersuisoq Maliina Abelsen tusarniaffigaarput nioqqutissat akileraaruteqanngitsut Kalaallit Nunaannut eqquteqqusaajunnaarnerisa kingorna landskarsi qanoq annertutigisumik pissarsisimanersoq, Kangerlussuarmi Nunaqarfimmi aqutsisut siulitaasuat Albricht Kreutzmann, aqutsisut sinnerlugit allagaqarpoq.
Taamanikkut naalakkersuisuusoq Palle Christiansen tunngavilersuivoq inerteqquteqalernerup kingunerisaanik landskarsi tupap aamma imagassap akitsuutaannik immikkut ittumik 25 millionit koruuninik isertitsissasoq.
- Kangerlussuarmi Pilersuisup Akitsuuteqanngitsunik Pisiniarfiutaa Pilersuisumut iluaraarutaalluartarpoq kiisalu aalaakkaasumik suliffissaqartitsilluni. Tamakku maani nunami assorsuaq pisariaqarippavut. Taamaattumik uagut (Nunaqarfimmi Aqutsisut, aaqq.) Pilersuisup Akitsuuteqanngitsunik Pisiniarfiutaa tamanut periarfissiilluni pisiniarfinngoqqinnissaa kissaatigaarput, Albricht Kreutzmann allagaqarpoq.