Takornariap annaassiniarsimasut qutsavigai
Qaannamik angalalluni takornariap Illoqqortoormiuni aggustimi 2010-mi annaanneqartup maanna allakkatigut imminerminik annaassisut qutsavigai kalaallillu nersualaarlugit asannittuunerarlugit isumassuisarnerarlugillu. Maanna illoqarfik utertitsivigerusuppaa
- Nassuiarsinnaanngilara qanoq toqqissisimatigisimanerlunga, qanorlu inuiaat Inuit ilagalugit nuannisarsimatiginersunga. Uummammit pisumik tatigisimavakka sulilu taamatut tatigalugit assorsuarlu qujamasullunga. Asanninneq inussiarnissuserlu misigisarput oqaasertassaqanngilaq! Inuit inuupput nalissaqanngitsut! Alice Gard mailikkut taamatut allattoq, sermersooq.gl ilisimatitsivoq.
Alice Gard qajartorlutik takornariartut 14-it ilagaat aggustimi ujaarineqartut piterarnerata kinguneranik anorersualiussaasut, kingusinnerusukkullu illoqqortoormiormiunit nassaarineqartut annaanneqartullu. Nanu Travel qaannamik takornariat ujaarineqarnerannik isumaginnittuusoq sapaatit akunneranni kingullermi Alicemit mailimik allagarsivoq, taassuma qujaniarfigai aamma Illoqqortoormiuni najugaqartut imminerminnik annaassisut iliuusaannik ikiuunnerannillu qutsavigalugit.
Mailikkut allakkamini oqaluttuarpoq inuunermini misigisani navianarnerpaartaat pikkunartoq, tamatuma aamma pinerani ilutigalugu asanninnermik inussiarnermillu misigisani annerpaajusoq. Immamit qaqinneqarami toqqissisimanartumut piniartunit illoqarfimmiunit ikiorneqarnermini, kissalaartumik pineqarnermini aamma nerisassaanik sassaallerfigineqarnermikkut, takornariat aallarnissamik tungaannut sutigut tamatigut ikiorneqarnermikkut.
Naggataatigut Alice allappoq Illoqqortoormiuni innuttaasunit ikiorneqarnerminik qujamasungaarami, Kalaallit Nunaat maqaasillugu utertitsiffigerusullugulu. Mailikkullu inuiaqatigiinnik arlaatigut aappanilu ikiuerusullutik nalunaarput. Marluullutik inunnik isumaginninnermi siunnersuisartutut ilinniarsimasuupput, atorfissaqartinneqarnertillu naapertorlugu arlaatigut ikuerusullutik.