Tuluttut ilinniarusuttut imaaginnavipput
Kommune Kujallermi tuluttut pikkorissarusuttut imaaginnavipput. 20 maanna utaqqisuni allatsissimapput.
Peqataaniarlutik nalunaartut katillugit 72-it 20-llu utaqqisutut allatsissimasut. Kujataani tuluttut pikkorissarnissat taamatut iluatsilluartigisimapput Kommune Kujalliup Oqaatsinik Ilinniarfik suleqatigalugu najukkami aatsitassat pillugit tuluttut oqaatsinik pikkorissarnissat sisamat neqeroorutigimmagit illoqarfinni Qaqortumi, Nanortalimmi aamma Narsami kiisalu Inuussutissarsiornermut aamma suliffeqarnermullu Ingerlatsivimmi sulisunut sullissinermut tunngasut tuluttut oqaatsinik pikkorissarnissaat.
Kommune Kujallermi Inuussutissarsiornermut aamma Suliffeqarnermut ataatsimiititaliami siulittaasoq Kalistat Lund oqarpoq:
- Pitsaaqaaq Kujataani suliffillit neqeroorut tamanna soqutigimmassuk. Pikkorissarnissanut kajumittorpassuaqarnerata takutippaa innutaasut annertunerusumik ilinniarusuttut paasisimagaallu tuluttut oqalussinnaanerup pitsaaqutaasa pisariaqarnera aatsitassat pillugit pilersaarutigineqartut annerpaamik pissarsiaaqatigissagutsigit. Nutaatut neqeroorutigaagut Inuussutissarsiornermut aamma suliffeqarnermut ingerlatsivimmi sulisut sullissinermi tuluttut oqaatsit pillugit pikkorissartitsinissaq, tassani aamma tuluttut oqalussinnaanerup annertusiartornera malugineqarmat.
Ataatsimiititaliami siulittaasoq aamma pitsaasutut isigaa pikkorissarnerit sumiiffinni ataasiakkaani ingerlanneqarnissaat:
- Inuiaqatigiit aningaasaqarniarnerat isigalugu pikkorissarnerit sumiiffinni ataasiakkaani ingerlanneqarnissaat pitsaasuuvoq, aningaasat ilinniartitaanermut atorneqassammata angalanermut sivisuumut atorneqaratik.
Narsami uani aamma sapaatit akunnerata tulliani pikkorissarnissat pilersaarutigineqartut kingullersaat ingerlanneqassaaq, kisianni allatsissimasut taamak amerlatiginerata kingunerisaanik Kommune Kujalleq Oqaatsinik Ilinniarfik suleqatigalugu maannakkut pilersaaruteqarpoq ukiamut pikkorissartitsinissanik, taamatut naggasiivoq ataatsimiititaliap siulittaasua.