Naser Khader taaguteqalerniarpoq Niels
Aviisit ullumikkut salloqittaatinik ulikkaarput: Naser Khader taaguteqalerniarpoq Nielsimik aamma Drillo qallunaat nunanut allanut unammisartuinut sungiusaasunngorniarpoq
Konservativit nunat allamiut akulerutsinneqarnissaannut oqaaseqartartuat Naser Khader atini qallunaarpaluttumik "Niels"-imik ilavai.
Qallunaap Syriamit kingoqqisup tamanna toqqarpaa ukiorpassuarni aqqi Naser paatsiveerussutaasarsimammat, Berlingske allappoq.
- Naggataatigut eqqarsalerpunga: Soormi Nielsimik ateqaannanngitsunga, Naser Khader aviisimut oqarpoq.
Aviisinik atuartartut isarussatik salittariaqarpaat, tassami tallimanngorneq apriilip aallaqqaatigaa aviisillu salloqittaatinik ulikkaarput.
Naser Khaderip atertaarnerata saniatigut Politiken oqaluttuarpoq Danmarki 30 kvadratmeterinik mikinerulersimasoq, tamatumunngalu pissutaasoq japanimi nunap sajorujussuarnerata kinguneranik nunap iluata nikissimanera.
Tamanna Rudbøl Sø'p eqqaani, Danmarkip Tysklandillu killeqarfiata eqqaani, ajornerpaajusimasoq Politiken allappoq.
Kristeligt Dagbladimi oqaluttuarineqarpoq Københavnimi Metroliornermi assaanernini paasineqartoq Danmarkimi amerlasuunik 1200-kkunniilli muslimeqarsimasoq. Inuit aqqi pillugit ilisimatusarnermik suliallip erseqqissarpaa danskit aqqat "Hansen" islamit naggueqartuusoq, ukiuni akullerni taaguut tassaasimalluni "Hassan-søn" Kristeligt Dagblad allaaserinnippoq.
MetroXpressimi oqaluttuarinnippoq Risømi atomip nukinganik misileraavimmit igitassat 223 kiilut inuusuttut illuata toqqavikuanut Jagtvej 69-imut assaallugit inissinniarneqartut. Fyns Stiftstidendemik atuartartut nuannaarutigisinnaavaat aviisip nammineerluni mobiltelefonimut akeqanngitsumik programmiliorsimasoq, taannalu atorlugu arnat naartusut nammineq ilumiortik assilillugu takusinnaalissagaat.
Ekstra Bladet nittartakkamini oqaluttuarpoq tennisertartoq Caroline Wozniacki Polenimi innuttanngorniartoq, Danmarkimi janteloven (nuts. sinngatunersuaq nakkarsaanertalik) qatsutiivikkamiuk.
Danskinut timersornermik nuannarisaqartunut immaqa amilaajumminnarnerpaavoq B.T.-p salloqittaataa. Aviisimi oqaluttuarineqarpoq DBU-p Morten Olsenip "balletimik arsartitsisarnera" qatsutivissimallugu maannakkut Drillo Norgemioq isumaqatigiinniarneqartoq.
Norgimiut nunanut allanut unammisartuisa sungiusaasuata suliassarissaqqooqaa siunissami Danmarki peqqarniitsumik saassusseqqittarnissaat arsaq anigaangat ilummut ungasissumut miloriussisarneq sakkugalugu, B.T. allaaserisaqarpoq.