Air Greenland ilumut qorsunngorpoq

CSR-politikkiminut atatillugu Air Greenland imminut ilisaritikkusuppoq suliffeqarfiulluni mingutsitsinaveersaartoq aamma sullerissoq. Siullertut timmisartut tamarmik qorsummik qalipanneqassapput, tamatumunngalu ilutigitillugu ingerlatsivik sipaarniuteqarneriarpoq timmisartortartut "qorsuunerusut" atorneqarnerisigut

Mingutsitsinngitsutut tusaamaneqarnerup takornariat Amerikap avannaarnersut tikerartissavai. Asseq: Air Greenland

- Air Greenlandimut aamma sullittakkanut alloriarneq annertuvoq ilutigitillugulu avatangiisit pillugit CSR-imi suliaqarnitsinnut attuumassuteqartumik iliuseqarnitsinnut ersersitsivoq", Michael Binzer oqarpoq tallimanngormat Air Greenlandip timmisartuutaasa ilaat marluk qorsummik qalipaatillit Nuummut aqqanernut minneranni tikilluaqqusigami.

Timmisartut - DASH 7-it - Italiami Romap avannaani suliffeqarfimmit Primo de Apriliamit Buffonep mittarfianiittumit, timmisartunik avatangiisinut mingutsitsinnginnerusumik qalipaanermik immikkut piginnaasaqarfiusumit, tooqqaannartumit tikipput. Air Greenlandip timmisartuutai tamarmik tamaani qalipanneqassapput, angallannermut pilersaarut tunngavigalugu ajornanngikkaangat ataasiakkaarlugit.

- Air Greenlandimut aamma sullittakkanullu ulloq pingaarutilik, pisortaq Michael Binzer oqarpoq, timmisartut siulliit nunnimmata. Helikopterit mikisut aamma S-61-it sinneruttut pisoqqat eqqarsaatigalugit Italiamukarnissaq ungasippallaarpoq. Taakku mittarfimmi mikinermi Sverigep avannaani Kirunap eqqaani Skämtfällami qalipanneqassapput.

Minngutsitsinnginnerulernissaq ingerlatsiviup inuiaqatigiinni akisussaaqataanissamik, aamma taaneqartartoq Corporate Social Responsibility, CSR, anguniagaanik tunngaveqarpoq. Septembarimi 2010 Air Greenlandip FNip ataaniittoq Global Compact atsioqataaffigaa, tassani peqataasut imminnut pisussaaffilerput inuit aamma sulisut piginnaatitaaffii, ileqqornermik akiuiniarneq aamma minnerunngitsumik silaannap avatangiisillu suleqataaffiginissaat.

- Timmisartuvut DASH-7-it marluk avatangiisinut mingutsitsinnginnerusunik DASH-8-nik taarsereerpavut, ilutigitillugu nukissiuutinik atuinerput ataatsimut isigalugu misissorluarparput, Michael Binzer ilisimatitsivoq.

Amerikap avannaanit takornariaqartarnissaq periarfissaalluarpoq

- Akuttunngitsumik misigisarparput amerikamiut takornariat utoqqaanerusut siullerpaamik Kalaallit Nunaannut tikittut pakatsisartut, Michael Binzer oqaluttuarpoq: - Naatsorsuutigisarpaa Greenland atiminut naleqquttuulluni nuna qorsuussasoq, misigigunikkullu qaarsut kajortuusut aamma imaq tungutsorissoq, ilaanneeriarlutik pakatsisarput. Ilaasalu naammagittaalliutigisarpaat naatsorsuutigisaminnut sanilliullugu iluliarsut taamak angitiginnerat, oqaluttuarpoq.

Akisussaassuseqarneq aningaasanik isertitsissutaavoq

Kalaallit Nunaanni takornarianik sullissisutut annerpaatut Air Greenlandip nammineq akisussaaffimmitut isigivaa Kalaallit Nunaata pitsaasumik avammut takutinneqartarnissaa. Taamaattumillu timmisartut tamarmik avatangiisinik mingutsitsinnginnerusumik qorsummik qalipaatilerneqarnerat, takornarianit utoqqaanerusunit USA-meersunit pisuujunerusunit iluarisimaarininnermut aamma aningaasanik isaatitsinermut ilapertuutaassaaq.

Timmisartortartut "qorsuunerusut"

Unammillersinnaajumalluni aamma avatangiisinik mingutsitsinnginneruniarluni Air Greenlandip timmisartortartuminik nutarteriniarluni aammattaaq aallartippoq:

- Timmisartortartutta ilaat ilumut ukiorpassuarni sulisimapput taakkulu avatangiisinut pitsaavallaarunnaarsimapput, Michael Binzer oqarpoq:

- Motooritut pisoqqatut ipput - iluarsaakkaluarlugit pitsaassusiat iluarsivinneq ajorpoq aamma piumassuseqarnerat annikillisarpoq. Taamaattumik pilersaarummik aallartitsivugut, timmisartortartut utoqqasaajunerit ingerlatsinermi akisuujusut "qorsuunerusunik" taarserneqassapput. Akikinneruliinnarnatik kisianni aammattaaq tusaamaneqarnermik nutaamik pilersitsissapput, naggasiivoq.

Powered by Labrador CMS