KNR amigartoorpoq

KNR-imi siulersuisut KNR-ip aningaasaqarniarnikkut inissisimanera isumakuluutigaat. 2010-mi ukiumut naatsorsuutini 2 miliuuni koruuninik amigartoornerput, ussassaarinermi isertitat appariarnerannik, annertunerusumik naammassisaqarsinnaalerniarnermut sulisunullu utaqqiisaasumik inigitinneqartartunut immikkut aningaasartuuteqarnermik pissuteqarpoq.

Naatsorsuuserisut ukiup aappassaaneerlutik oqaatigaat, KNR aningaasanik tiguinnarissanik amigaateqartoq, landskarsimiillu arlaatigut suliffeqarfik immikkut ittumik taperneqanngippat tamatuma iluarseriarsinnaanera takujuminaatsoq.

Aningaasartuutissatut naatsorsuutit 17 mio. koruuninik sipporsinnaanerannut akuersissut maannakut 16 mio. koruuninngortoq, 2007-imi digital-inik atortusiortornissaq pissutigalugu isumaqatigiissutaavoq. Taakkualu tamarmik suli akilersorneqanngitsut nutaanik atortusisoqaqqinissaa ilimagineqarmat, amigartoorutit suli amerlanerulissangatinneqarput.

- Aningaasaqarniarnerput isumakuluutigaarput. Akiitsutta akilerniarnerat aningaasaliissutissallu nutaat annertuumik unammillernartoqarput. KNR nammineq aaqqiissuteqarsinnaanngilaq, avataaniillu tapiisoqarnissaa siulersuisunit kissaatigineqarpoq. Aningaasaateqarfimmit KNR-ip ingerlanneqalernissaa pilersaarutigineqartoq iluatsillugu tamanna pisinnaavoq, naak ingerlatseriaatsip allanngornerinnaatigut ingerlatsinermut aningaasartuutit aaqqiiffigineqarsinnaanngikkaluartut, siulersuisunut siulittaasoq Peter Jensen tusagassiuutinut nalunaarummini allapoq.