Aningaasaateqarfiup aningaasaateqarluartup ilinniagaqartut tapersersussavai
Ilinniagaqartunut aningaasaateqarfip nutaaq 16 miliuuni koruuninik tunngaviusumik aningaasaatilik pilersinneqarpoq. Aningaasaateqarfik Nunatsini nunanilu allani ilinniagaqartunut tapiisassaaq.
- Neriuppugut inuusuttut pimoorussillutik ilinniagaqarnissaannut, Kalaallit Nunaannut iluaqutaasinnalertussanut ikiuussinnaassalluta, aningaasaateqarfiup siulittaasua, eqqartuussissuserisoq Michael Kjeldsen Radioaviisimut oqarpoq, maannangaarlu qinuteqartoqarsinnaalereersoq erseqqissaatigalugu.
Ilinniagaqartunut aningaassaateqarfik nutaaq, taaguuteqartoq Dudo og Povl Brandts Fond, Nunatsinni inuussutissarsiornikkut ilisimaneqarluartumit, ilaatigut Godthåb Betoncentral-imik, Magasinet-imik kiisalu Qajaq Trawl-imik ingerlatsisumit, Povl Brandt-imit nulianillu Dudo-mit pilersinneqarpoq. Aningaasaateqarfiup Nunatsinni ilinniagaqartut, ilinniagaqartullu Nunatsinnut attuumassuteqartut salliutillugit tapiiffigisarniarpai.
Aningaasaateqarfik 16 miliuuni koruuninik aningaasaateqarpoq, taamaammallu ukiumut 800.000-it 1,2 miliuuni koruunillu missaaniittut tapiissutigineqartarnissaa siunniuneqartoq, KNR-imi oqaatigineaqarpoq.
Aningaasaateqarfiup malittarisassaani naqissuserneqarpoq tapiiffigineqartut tassaasassasut, kalaallit imaluunniit skandinaviami ilinniagaqartut Kalaallit Nunaannut attuumassuteqartut, qaffasinnerusumik ilinniagaqartut, tassani pineqarlutik gymasiami imaluunniit niuernermik iliniarfimmi naammassereerlutik qaffasinnerusumik ilinniagaqartut.