Takornariartaatinut ilaasut aatsaat taamak amerlatigisut
2010-p ingerlanerani pingaaruteqartoq anguneqarpoq, aatsaavissuaq Kalaallit Nunaannut umiarsuarnut takornarianik angallassasisartunut ilaasut aasap ingerlanerani tikittut 30.000-it sinnermatigit
Nunatsinni Takornariaqarnermut Inuussutissarsiornermullu Siunnersuisooqatigiit aasap ingerlanerani umiarsuarnut takornarianik angallassisartunut ilaallutik tikissimasut qanoq amerlatiginerat naatsorsorneqarnerat paasereerlugu assut iluarusupput:
- Ineriartorneq tamanna assut iluarisimaarparput, rekorti aamma amerliartornerat ukiuni kingullerni malugisimasarput tunngavigalugu imaammat Kalaallit Nunaanut suli ornigassatut ornigineqartoq pilerigineqarlunilu, umiarsuarnut takornarianik angallassisartunut tunngatillugu siunnersorti Malik Milfeldt oqarpoq.
Nunat allat Atlantikorsuup Avannaaniittut aammattaaq umiarsuit takornarianik angallassisartunik aamma takornarianik tikittoqartarnerat annertusiartorpoq, kisianni takornariaqarnermut tunngatillugu iluatsitsiartorneq Nunatsinni pikkorinniutiginngilaa.
- Nuna tamakkerlugutakornarianik sullissisartunut arlalinnut umiarsuit takornarianik angallassisartut nunami takornarianinngarnit isertitaqarfiunerusarput, tamannalu immaqa arlalinnit ilisimaneqanngilaq. Kisianni qitiusoq tassaavoq uagut tamatuminnga suliaqartuusugut annertunerusumik isiginiartariaqarparput, siunissami qanoq iliorluta isertissinnaasavut annertusarsinnaassanerlugit kiisalu aammattaaq umiarsuit pissarsinarnerpaat tikitsinissaat qitiutinnerullugit, Malik Milfeldt oqarpoq nangillunilu:
- Iluatitsiartorneq attatiinnassagutsigu aammattaaq tikinnermi taliffissatut periarfissat, umiarsuarnut neqeroorutigineqartut isornartorsiuilluta isiginiartariaqarpavut. Amerlasuutigut naammaginanngillat ilaatigullu sillimaniarnermut tunngatillugu qularnaatsuusarnatik kiisalu amerlasuutigut puttasumik immikkut ikkussisoqaraluarpat, tamanna umiarsuarnut takornarianut ilaasunut tikinneranni aamma aallarneranni assorsuaq iluaqutaasinnaavoq, naggasiivoq.
Landskarsimut akitsuutaannaat eqqarsaatigalugu takornariat umiarsuarnut angallassisartunut ilaallutik tikittut 15.892.275 millionit koruuninit isertitsissutaapput, umiarsuaatileqatigiit tikeraamut ataatsimut Kalaallit Nunaannut tikinnermi 525 kr.-inik akiliuteqartarmata.